АСТАНА, 07 - ақпан. - Eurasia Todaу. 6 ақпанда Душанбедегі Миллат сарайында Тәжікстан Республикасының Президенті Эмомали Рахмон Ислам даму банкі тобының операциялар жөніндегі вице-президенті доктор Мансур Мұхтарды қабылдады.

Кездесуде Тәжікстан мен Ислам даму банкі арасындағы ынтымақтастықтың түрлі аспектілері талқыланды.
Эмомали Рахмон Ислам даму банкімен өзара тиімді ынтымақтастық деңгейіне қанағаттанатынын айтып, Банктің Тәжікстанның әлеуметтік-экономикалық дамуына бағытталған жобаларды жүзеге асыруға қосқан үлесін жоғары бағалады.
Кездесуде тараптар білім беру, денсаулық сақтау, энергетика, көлік, ирригация және Тәжікстанның басқа да басым әлеуметтік-экономикалық салаларындағы инвестициялық жобаларды жүзеге асыру мәселелерін талқылады.
Айта кетейік, Тәжікстан тәуелсіздік алған кезеңде Ислам даму банкі осы елде жалпы сомасы 620 миллион доллардан астам маңызды жобаларды жүзеге асырды.