НҰР-СҰЛТАН, 31 - наурыз. - Eurasia Todaу. Өзбекстан президенті Шавкат Мирзиеев пен Түркия президенті Режеп Тайып Ердоған Жоғары деңгейдегі стратегиялық ынтымақтастық кеңесінің екінші отырысының қорытындысы бойынша Бірлескен мәлімдемеге қол қойды.

Сонымен қатар, екі елдің үкіметтері, министрліктері мен ведомстволары деңгейінде көпқырлы өзбек-түрік ынтымақтастығын одан әрі кеңейтуді көздейтін 9 құжатқа қол қойылды.

Соның ішінде, преференциялық сауда туралы келісім, мемлекеттік шекара арқылы тауарлар мен көлік құралдарының өтуі туралы ақпаратпен алдын ала алмасу туралы хаттама, еңбек және жұмыспен қамту саласындағы ынтымақтастық туралы өзара түсіністік туралы меморандум, сот сараптамасы саласындағы ынтымақтастық туралы меморандум, құрылыс саласындағы өзара түсіністік туралы меморандум, Денсаулық сақтау министрліктері арасындағы 2022-2023 жылдарға арналған іс-шаралар жоспары, Өзбекстанның Ұлттық ақпарат агенттігі мен Түркияның Анадолу агенттігі арасындағы ынтымақтастық туралы келісім және т.б.

Айта кетейік, Өзбекстан Республикасының Президенті Шавкат Мирзиёевтің шақыруымен Түркия Республикасының Президенті Режеп Тайып Ердоған жұбайымен бірге 29 наурызда Ташкентке ресми сапармен келді.

Түркия Республикасының президентін Ташкенттегі халықаралық әуежайда Өзбекстан президенті мен оның жұбайы күтіп алды.
«Куксарай» резиденциясында Өзбекстан Республикасы мен Түркия Республикасы президенттерінің ресми кездесуі өтті.