НҰР-СҰЛТАН, 17 - қыркүйек. - Eurasia Todaу. Қырғыз Республикасының Президенті Садыр Жапаров Тәжікстан Президенті Эмомали Рахмонмен мемлекеттік шекараның қырғыз-тәжік учаскесіндегі жағдай бойынша келіссөз жүргізді.

16 қыркүйекте Қырғыз Республикасының Президенті Садыр Жапаров Самарқандта өтіп жатқан Шанхай ынтымақтастық ұйымының саммиті аясында Тәжікстан Республикасының Президенті Эмомали Рахмонмен кездесті.

Тараптар мемлекеттік шекараның қырғыз-тәжік учаскесіндегі жағдайды талқылады.

Екі ел басшылары тиісті құрылымдарға атысты тоқтатып, күштер мен құралдарды түйісу шебінен шығаруды тапсыруға келісті.

Мемлекет басшылары бірауыздан барлық туындаған мәселелерді тек саяси және дипломатиялық жолмен шешу керек деген пікірде болды.

Қырғыз Республикасының Министрлер кабинеті төрағасының орынбасары – Қырғыз Республикасы Ұлттық қауіпсіздік мемлекеттік комитетінің төрағасы Камчыбек Ташиев пен Тәжікстан Республикасы Ұлттық қауіпсіздік мемлекеттік комитетінің төрағасы Саймумин Ятимов орнында жұмыс істейді, оқиғаның мән-жайын және себептерін зерттеу бойынша комиссия құрылады.

Сондай-ақ келіссөзде Қырғызстан мен Тәжікстанның мемлекеттік шекараны делимитациялау және демаркациялау жөніндегі үкіметаралық комиссиясының жұмысын жеделдету туралы келісімге қол жеткізілді.