АСТАНА, 12 - мамыр. - Eurasia Todaу. Пәкістанда бұрынғы премьер-министр Имран Хан қамауға алынғаннан кейін елде наразылықтар басталды.

Имран Хан қамауға алынғаннан кейін Пәкістанда басталған наразылық акцияларында қаза тапқандар саны 9 адамға жетті, 290-нан астам адам жараланды.

Пәкістандық БАҚ мәліметінше, Хайбер-Пахтунхва провинциясындағы наразылық акцияларында жеті адам қаза тапса, Белуджистан мен Пенджаб провинцияларында бір адамнан қаза тапқан.

Исламабадтан солтүстік-батысқа қарай орналасқан шағын Тарнол қаласында ереуілшілер теміржол жолына зақым келтірген.

Сондай-ақ Лахордағы Шадман полиция бөлімінде шерушілер мүлік пен полиция көліктеріне де зиян келтірді.
Исламабад пен Пешаварда наразылық білдірушілер көшелерді жауып тастады.

Айта кетсек, Исламабадта Пәкістанның бұрынғы премьер-министрі және «Әділет қозғалысы» оппозициялық партиясының төрағасы Имран Хан 9 мамыр күні тұтқындалды. Саясаткер «Әл-Қадир траст» қорының қаражатын мақсатсыз ысырап ету ісі аясында қамауға алынды.