АСТАНА, 24 - мамыр. - Eurasia Todaу. ТҮРКСОЙ ұйымы, Қазақстан Республикасының Мәдениет және спорт министрлігі мен Қазақстанның Анкарадағы Елшілігінің бірігіп ұйымдастыруымен көшпенділердің дәстүрлі сусыны – қымызға арналған «Қымыз Fest» халықаралық фестивалі Анкара қаласында өтті.

Іс-шараға ТҮРКСОЙ Бас хатшысы Сұлтан Раев, Қазақстанның Түркиядағы Елшісі Еркебұлан Сәпиев, Астана қаласынан «Ұлы тағзым» қоғамдық ұйымы директорының орынбасары Нұрлан Омаров, Дүниежүзі қазақтарын дамыту қорының төрағасы Ерлан Байын, қазақ диаспорасы мен зиялы қауым өкілдері, қазақстандық студенттер, Анкараның жергілікті халқы мен бұқаралық ақпарат өкілдері қатысты.
Фестивальдің ашылуында сөз алған Қазақстан Елшісі Еркебұлан Сәпиев қазақ халқының салт-дәстүрі мен әдет-ғұрпын дәріптейтін мұндай фестиваль биыл Анадолының жүрегі Анкарада алғаш рет өткізіліп отырғанын, жалпы қымыз түркі мәдениетінің маңызды бір бөлігі болып табылатынына назар аударып, Қазақстанда «Қымыз Fest» мереке ретінде аталып өтілетінін баяндады.
Нұрлан Омаров сөзінде бүгінгі қымыз мерекесі алғаш рет ресми түрде Қазақстаннан тыс бауырлас Түркия елінде өтуі екі бауырлас елдің тарихында із қалдыратын оқиға екенін, «Қымыз мерекесі» Еуропа мен Қытай елдерінің тарихшылар мен саяхатшыларының жазба деректерінде жазылғанын және жалпы түркі халықтарының ең басты мерекесі болып табылатынын баяндады.
Іс-шара барысында қатысушылар қазақ халқының ұлттық сусыны – қымыздың әзірлену жолдарымен танысты. Фестивальге қатысқан қонақтарға қымыз бен қазақтың дәстүрлі тағамдары ұсынылды және қазақтың әні мен күйі орындалды.
Қымыз фестивалі келген қонақтар мен жергілікті халық тарапынан үлкен қызығушылыққа ие болды.