Мемлекет басшысы Қасым-Жомарт Тоқаев кеше, 11 ақпан күні Иран президенті Ибраһим Раиси мен ирандықтарды Ұлттық күні — Ислам революциясының жеңісі күнімен құттықтады.
«Бұл туралы Ақорда мәлімдеді» деп жазады kz.eurasiatoday.ru агенттігінің тілшісі.
Мемлекет басшысының Қазақстан халқының және жеке өзінің атынан құттықтаған жеделхатында: «Бүгінде Иран – саяси тұғыры берік, экономикасы тұрақты дамыған халықаралық қауымдастықтың беделді мүшесі. Ұлт бірлігі мен ынтымағын ту еткен мемлекетіңіз Сіздің басшылығыңызбен алдағы уақытта да игі мақсат-мұраттарға жете беруіне тілектеспін.
Иран – біздің Каспий аймағындағы маңызды серіктесіміздің бірі. Осыған орай дәстүрлі достық пен мазмұнды саяси диалогқа негізделген ықпалдастығымыз өзара тиімді сауда-экономикалық және мәдени-гуманитарлық ынтымақтастығымызды нығайтуға берік арқау бола беретініне кәміл сенемін», — деп жазылған.
Сондай-ақ, Қасым-Жомарт Тоқаев Иран президентінің қызметіне толағай табыс, ал достас Иран халқына құт-береке тіледі.
11 ақпан Иранда революцияның жеңіске жеткен күніне орай Ұлттық мереке саналады.
1979 жылы дәл осы күні Иранда шах режимі құлатылып, Иран Ислам Республикасы жарияланды.
Қазақстан мен Иран Ислам Республикасы арасындағы дипломатиялық қатынас 1992 жылы 29 қаңтарда орнады. Қазақстанның Ирандағы елшілігі 1993 жылдан бері жұмыс істеп келеді.












