Көктемгі шақыру науқаны негізінде Қарулы Күштердің қатарын 18 бен 27 жас аралығындағы жиырма мыңға тарта қазақстандық толықтырады.
Қорғаныс министрлігі баспасөз қызметінің хабарлауы бойынша бірінші наурыздан бастап әскерге шақыруды кейінге қалдыруға немесе босатуға негіз жоқ азаматтарды шақыру жөніндегі іс-шаралар басталды.
Қазақстан Қарулы Күштері Бас штабы Ұйымдастыру-жұмылдыру жұмысы департаменті бастығының орынбасары полковник Азамат Досымов биылғы жылдың 30 маусымына дейін Қарулы Күштердің, басқа да әскерлер мен әскери құралымдардың қатарын 18 бен 27 жас аралығындағы жиырма мыңға тарта қазақстандық толықтыратынын, Қарулы күштерге 10 000-ға жуық, Ұлттық ұланға 6 500-ден астам, ҰҚК Шекара қызметіне 3 000-дай, Төтенше жағдайлар министрлігіне және Мемлекеттік күзет қызметіне 500-ден аса азаматты шақыру жоспарланғанын мәлімдеді.
Айта кетейік, Қазақстанда жыл сайын 18-27 жас аралығындағы жас жігіттер әскерге шақырылады. Әскерге шақыру науқаны жылына 2 рет: сәуірден маусымға дейін және қазаннан желтоқсанға дейін жүзеге асырылады
Әскери қызмет және Қазақстан Республикасын қорғау әр азаматтың парызы мен міндеті болып табылады. Алайда азаматтың денсаулық жағдайы сияқты әскерден уақытша және тұрақты негізде босататын бірқатар жағдай бар.
Еске салайық, 2023 жылы Қазақстан Республикасында 37 000 азамат мерзімді әскери қызметке шақырылды.












