Иранның Ұлттық қауіпсіздік жоғары кеңесінің хатшысы Әли Лариджани АҚШ-пен ядролық бағдарлама бойынша қайта жанданған жанама келіссөздерден кейін Оманға сапармен барды.
Еуразия Тудейдің хабарлауы бойынша, Иранның Ұлттық қауіпсіздік жоғары кеңесінің хатшысы Әли Лариджани сапар барысында Оман Сұлтандығының жоғары лауазымды тұлғаларымен кездесіп, келіссөз жүргізеді.
Тараптар кездесу барысында аймақтық және халықаралық оқиғаларды, сондай-ақ, екі ел арасындағы екіжақты ынтымақтастықты нығайту жолдарын талқылайды.
Лариджанидің Масқатқа сапары Тегеранның өңірлік консультациялары аясында алдын ала жоспарланған. Сонымен қатар, бұл сапар Иран мен АҚШ арасындағы диалогтың қайта басталуымен тұспа-тұс келіп отыр.
6 ақпан күні Иран мен АҚШ делегациялары Масқатта Иранның ядролық бағдарламасы бойынша келіссөз жүргізді.
Иран Сыртқы істер министрі Аббас Арақчи мұның алдында келіссөздердің тек ядролық бағдарламаға қатысты екенін растап, Иранның зымырандық бағдарламасы мен аймақтық саясатын талқылауды жоққа шығарды.
Министр қазіргі кезеңде Иран ұсыныстарының егжей-тегжейі туралы айту ерте екенін айтты. Оның айтуы бойынша, Тегеран санкцияларды алып тастауға айырбас ретінде сенімді нығайту шараларын қарастыруға дайын.
Министр келіссөздердің жалғасуы Тегеран мен Вашингтон қабылдайтын шешімдерге байланысты екенін, ал келесі келіссөз кезеңінің уақыты мен орны Оман Сыртқы істер министрі Бадр Әл-Бусаиди арқылы анықталатынын атап айтты.
Арақчи келіссөздер алаңының өзгеруі мүмкін екенін жоққа шығармады, бірақ Иран тарапы үшін диалог форматының жанама күйінде қалатынын баса айтты. Осы орайда, Әли Лариджанидің Масқатқа сапары Иран мен АҚШ арасындағы араағайын мемлекет Оман рөлінің артып келе жатқанының бір дәлелі ретінде қарастырылуда.












