Иранның Қарулы күштері Ормұз бұғазын оңай миналауы мүмкін, ал АҚШ-тың әскери-теңіз күштері бұл бағытты сәтті тазарту үшін жеткілікті әлеуетке ие емес.
Еуразия Тудейдің хабарлауы бойынша, мұндай пікірді жапондық Асахи басылымына берген сұхбатында америкалық Сыртқы саясатты зерттеу институтының әскери-теңіз мәселелері жөніндегі сарапшысы Эмма Солсбери білдірді.
Эмма Солсбери: «Иранның шамамен бірнеше мың теңіз минасы бар. Ең бастысы, оларды орналастыруға арналған көптеген құралдары бар. Ислам революциясы Сақшылар корпусы флотының жүрдек қайықтарын қарапайым шағын кемелерден ажырату қиын. Сондықтан оларды алдын ала залалсыздандыру да оңай емес. Ормұз бұғазы тар, сондықтан аз ғана минамен де кеме қатынасын тоқтатуға болады. Бұл Иран Қарулы күштері үшін үлкен қиындық тудырмайды.
АҚШ әскери-теңіз күштері қырғи-қабақ соғыс кезінде теңіз миналарын тазартуда тиімді мүмкіндіктерге ие болды. Алайда кейін қаржыландырудың азаюы мен басымдықтардың өзгеруіне байланысты бұл мүмкіндіктер едәуір төмендеді.
Қазіргі таңда АҚШ-та теңіз аймақтарын миналардан тазарту үшін қажет әлеует жоқ, әсіресе Иран тарапынан зымырандар мен дрондар арқылы шабуыл жасау қаупі сақталған жағдайда”,-деді.
Сарапшының айтуынша, АҚШ миналарды тазартуда НАТО-дағы басқа елдердің мүмкіндіктеріне тәуелді.
Эмма Солсбери: “Алайда одақтастар Ормұз бұғазындағы әскери іс-қимылдарға қатысу үшін өз күштерін жіберуге келіспейді», — деді.
Бұған дейін CBS News телеарнасының тілшісі АҚШ барлау қауымдастығы Иранның Парсы шығанағынан Оман шығанағына және әрі қарай ашық мұхитқа шығатын Ормұз бұғазын миналағаны туралы мәлімет алғанын мәлімдеді. Бұл бағыт арқылы әлемдік мұнай экспортының бестен бірі өтеді. Алайда кейін АҚШ президенті Дональд Трамп Ормұз бұғазының миналанғаны туралы өзінде мәлімет жоқ екенін айтты.












