АҚШ Иранға қарсы әскери қысымды азайтса, Тегеран Ормұз бұғазын жеті күн ішінде ашады.
Еуразия Тудейдің хабарлауы бойынша бұл туралы Жапонияның «Kyodo» ақпарат агенттігі аты аталмаған ирандық жоғары лауазым иесінің сөзіне сілтеме жасап мәлім етті.
Осы мәліметке сәйкес, Иран тарапы АҚШ Тегеранға қарсы әскери қысымды азайту бойынша бастапқы қадам жасайтын болса, Ормұз бұғазын жеті күн ішінде ашуды ұсынғанын мәлімдеді.
Ирандық дереккөзі аталмыш ұсыныс делдалдар арқылы алдын ала Вашингтонға жеткізілгенін және бұл екі ел арасындағы соғысты тоқтату туралы келісімге қол жеткізу мақсатында келіссөздерді қайта бастауды қамтитынын айтты.
Сондай-ақ, ирандық жауапты тұлға ел Президенті Масуд Пезешкианның Нью-Йоркте өтетін БҰҰ Бас Ассамблеясының 81-ші сессиясы аясында АҚШ Президенті Дональд Трамппен кездесуі мүмкін деген болжамды теріске шығарды.
Сонымен қатар ол келісімге қол жеткізу бағытында қадам жасайтын мүмкіндік бар екенін де айтты. Дереккөзінің пікірінше, дипломатияның дамуы үшін Вашингтон шынайылығын көрсетіп, жауапкершілік танытуы тиіс.
Сонымен қатар бүгін, 22 қыркүйек күні ирандық жоғары лауазымды басшы «Reuters» агенттігіне берген сұхбатында, егер Америка Құрама Штаттары әскери қысымын азайтып, Иран порттарының қоршауын ашса, Иранның Ормұз бұғазын жеті күн ішінде қайта аша алатынын мәлімдеді.
Ол сондай-ақ, «Reuters» агенттігіне: «АҚШ бұл мәселені дипломатикалық жолмен шешкісі келетінін ресми түрде жариялап, содан кейін бұл үрдісті қалай іске асыру керектігі туралы кесте бойынша келісуі керек», — деді.
Ирандық лауазым иесі БҰҰ Бас Ассамблеясына қатысу үшін сейсенбі күні таңертең Тегераннан Нью-Йоркке аттанған ирандық делегацияның АҚШ-пен дипломатиялық байланысты жандандыру үшін толық өкілеттікке ие екенін мәлімдеді..
Дереккөзі Иран Президенті Масуд Пезешкианның БҰҰ штаб-пәтерінде АҚШ Президенті Дональд Трамппен кездеспейтінін, Тегеран мен Вашингтон арасындағы дұшпандықты тоқтату туралы келісімнің егжей-тегжейі Нью-Йоркте делдалдар арқылы талқылануы мүмкін екенін айтты. Оның айтуы бойынша, Иранның ұсынысы 16 қыркүйекте делдалдар арқылы АҚШ-қа табысталған.
«БҰҰ Бас Ассамблеясы – АҚШ үшін дипломатияға оралудың таптырмас мүмкіндігі», — деді ол.
Ол егер Вашингтон нақты әрі сезілетін әрекеттер жасайтын болса, Тегеранның дипломатикалық бағытты қайта жандандыруды қолдайтынын айтты.












