Ауғанстан жөніндегі өкілдер мен уәкілдер ауған халқын қолдауды жалғастыруға дайын екендерін растады.
Еуразия Тудейдің ҚР СІМ баспасөз қызметіне сілтеме жасап хабарлауы бойынша Брюссельде Ауғанстан бойынша Еуропалық одақ пен Орталық Азия елдерінің арнайы өкілдері мен уәкілдерінің жетінші кездесуі өтті.
Іс-шараға Қазақстан Республикасы Президентінің Ауғанстан жөніндегі Арнайы өкілі – Сыртқы істер министрлігінің Ерекше тапсырмалар жөніндегі елшісі Еркін Тұқұмов, сонымен қатар Қырғызстан, Тәжікстан, Түрікменстан, Өзбекстан өкілдері, сондай-ақ Еуропалық одақтың Ауғанстан жөніндегі Арнайы өкілі Жиль Бертран мен Еуропалық одақтың Орталық Азия жөніндегі Арнайы өкілі Эдвард Стипрайс қатысты.
Кездесу барысында қатысушылар Ауғанстандағы ағымдағы жағдайды талқылап, ауған халқына гуманитарлық көмек көрсетуді жалғастырудың және бұл елдегі тұрақтылықты қамтамасыз ету жөніндегі өңірлік күш-жігерді жандандырудың маңыздылығын атап өтті.
Кездесу қорытындысы бойынша тараптар Ауғанстанда ұзақ мерзімді бейбітшілік пен орнықты дамуға қол жеткізудің қажеттілігіне тоқталып, Орталық Азия елдері мен Еуропалық одақ арасындағы ынтымақтастықты одан әрі нығайтуға және ауған халқына көрсетілудегі қолдауды жалғастыруға дайын екенін растады.
Айта кетейік, «Ауғанстан бойынша ЕО мен Орталық Азияның арнайы өкілдері мен уәкілдерінің кездесулері» атты диалог алаңы 2021 жылы құрылды.












