АҚШ президенті Джо Байден мен жаңадан сайланған президент Дональд Трамп 20 қаңтарға дейін Газа секторы мәселесін бірлесіп шешуге ниетті.
Еуразия Тудейдің Axios сайтындағы мәліметке сілтеме жасап хабарлауы бойынша, Джо Байден Ақ үйде АҚШ-тың жаңа сайланған президенті Дональд Трамппен екі сағатқа созылған кездесуде Израиль мен ХАМАС арасындағы атысты тоқтату үшін бірлесіп жұмыс істеуді сұраған.
Axios сайтының жазуынша, Джо Байден сәрсенбі күні Газа секторында тұтқынға алынған америкалықтардың отбасы мүшелерімен кездесу өткізген. Кездесуде Байден Трамп екеуі кепілге алынғандарды 20 қаңтар — АҚШ-тың жаңа сайланған президентінің ұлықтау рәсіміне дейін босатуға ниетті екенін мәлімдеген.
Байден екі сағатқа созылған сұхбатта Трамптан Израиль мен ХАМАС арасында кепілге алынғандарды қайтару және Газа секторында атысты тоқтату туралы келісімге қол жеткізу үшін күш біріктіруді сұраған.
Байден президенттік қызметіндегі қалған екі айын Газа секторы келіссөздеріндегі ұзаққа созылған тығырықтан шығу үшін пайдаланғысы келеді.
АҚШ президентінің Ұлттық қауіпсіздік жөніндегі көмекшісі Джейк Салливанның айтуынша, Ақ үй Трамп командасымен Газа секторында кепілге алынғандарды босату мәселесінде бірлесіп жұмыс істеуге дайын екенін білдіретін белгі жіберген.
27-28 қазанда Қатарда Моссад барлау қызметінің басшысы Дэвид Барнеа мен АҚШ Орталық барлау басқармасының директоры Уильям Бернстің қатысуымен Газа секторы бойынша кеңестердің кезекті раунды өтті.
Израиль Премьер-министрі Биньямин Нетаньяхудың баспасөз қызметінің хабарлауынша, келіссөздер барысында бұрынғы ұсыныстарды біріктіретін және аймақтағы қазіргі жағдайды ескеретін жаңа жоспар талқыланды.
Axios сайтының мәліметінше, Бернс келіссөздер барысында Газа секторында 28 күндік бітімге келуді және тұтқынға кепілге алынған сегіз әйелді немесе 50 жастан асқан ер адамдарды айырбастауды көздейтін жаңа атысты тоқтату форматын ұсынған.












