Бүгін, 28 ақпанда Бішкекте Қырғызстан мен Түркия арасындағы сауда-экономикалық ынтымақтастықты дамыту бойынша бизнес-форум өтеді.
Бұл туралы Қырғызстан Экономика және сауда министрлігінің баспасөз қызметі хабарлады.
Министрліктің мәлімдеуінше, форум Қырғызстан мен Түркия арасындағы іскерлік байланыстарды нығайту және жандандыру мақсатында ұйымдастырылып отыр.
Іс-шараның басты мақсаты-түрік инвестицияларын тарту, экономиканың түрлі салаларында бірлескен кәсіпорындар құру, сондай-ақ, Қырғызстан өнімдерінің Түркия нарығына қолжетімділігін кеңейту болып табылады.
Бизнес-форум екі ел үшін жаңа байланыс орнату және іскер топтардың өкілдері арасында өзара тиімді серіктестік орнату мақсатында тиімді алаң болады деп күтілуде.
Қырғызстан Экономика және сауда министрлігінің мәліметінше, форум бағдарламасына Қырғыз Республикасы экономикасының басым салалары бойынша жобалардың тұсаукесерлері енгізілген.
Форум аясында ұйымдастырылатын көрмеде қырғызстандық компаниялар өз өнімдерін ұсынады.












