Брюссельдегі Еуропарламент ғимаратының алдында Израиль тұтқындаған атақты палестиналық дәрігер және құқық қорғаушы Хусам Әбу Сафияны босатуды талап еткен наразылық шеруі өтті.
Еуразия Тудейдің Anadolu агенттігіне сілтеме жасап хабарлауы бойынша, көптеген медицина қызметкерлері қатысқан шеруде наразылар Газа секторындағы Израильдің геноцид қылмысын және медициналық мекемелер мен медицина қызметкерлеріне жасаған шабуылдарын айыптап, ұрандар айтты.
Шерушілер Палестинаны қолдап, қолдарына осы елдің туы мен баннерлер ұстап шықты.
Anadolu агенттігінің тілшісі шеруге қатысушы бельгиялық дәрігер Ханне Босселаерспен тілдесті. Агенттіктің сұхбатшысы: “Егер сіз медицина қызметкері болсаңыз, онда өмір сүруді, адамгершілікті және абыройды қорғайсыз. Сондықтан, сіз палестиналық дәрігерлермен бірге болуыңыз керек.
Газа секторындағы геноцид қылмысы туралы үнсіздікке жол берілмейді.
Палестинадағы этникалық тазарту және Палестина халқынан құтылу Израиль құрылған кезде жоспарланған болатын. Қазір олар бұл қылмыстарын Газа секторында жасап отыр. Геноцид денсаулық сақтау жүйесін толығымен жоюды да қамтиды”, -деді.
Босселаерс Израиль күштерінің Газа секторындағы медицина қызметкерлерін жүйелі түрде қамауға алып, азаптап жатқанын айтып, қазіргі уақытта эксклавтың 450 денсаулық сақтау қызметкері қамауда отырғанын еске салды.
Хусам Әбу Сафия — Газа секторының солтүстігіндегі Камал Адван ауруханасының директоры. Оны желтоқсан айында ауруханаға жасалған рейд кезінде Израиль әскерлері ұстап әкеткен.












