БҰҰ Бас хатшысы Антониу Гутерриш адамзаттың болашағын айқындайтын технологияны тек шағын елдер немесе компаниялар тобы ғана басқармауы керек екенін баса айтты.
Еуразия Тудейдің хабарлауы бойынша БҰҰ басшысы Антониу Гутерриш бүгін, жұма, шілденің 17 күні Шанхайдағы Дүниежүзілік жасанды интеллект конференциясының ашылу салтанатында сөйлеген сөзінде жасанды интеллектіні жаһандық алшақтықтардың көзіне емес, жалпыға бірдей дамудың құралына айналдыруға шақырды.
Гутерриш жаңа технологиялардың адам өмірін құтқаруға қауқарлы екенін, алайда олардың артықшылықтары барлық елге қолжетімді болуы тиіс екенін баса айтты.
ҚХР Төрағасы Си Цзиньпин қатысқан конференцияның ашылу салтанатында Гутерриш жасанды интеллекттің адамзатқа орасан зор мүмкіндік ашатынын, бірақ сонымен бірге елеулі тәуекел де тудыратынын атап өтті.
Бас хатшы: «Адамзаттың болашағын айқындайтын технологияны бүкіл адамзат қалыптастыруы тиіс. Оны тек шағын елдер немесе компаниялар тобы ғана басқара алмайды», – деп мәлімдеді.
Оның айтуынша, дәл осындай тәсіл Қытайдың қолдауымен БҰҰ Бас Ассамблеясы қабылдаған Жаһандық цифрлық келісімде бекітілген.
БҰҰ басшысы халықаралық ынтымақтастық болмаса, жасанды интеллект қазіргі теңсіздікті одан әрі күшейтуі мүмкін екенін ескертті. Бүгінде әлем халқының үштен бірі әлі күнге дейін интернетке қол жеткізе алмай отыр, ал есептеу қуаттары, деректер мен техникалық білім шектеулі ғана мемлекеттер мен компаниялардың қолында шоғырланған.
«Біз жасанды интеллектің әлемді бұдан да үлкен теңсіздікке, Солтүстік пен Оңтүстік арасындағы табыс, мүмкіндіктер мен қауіпсіздік саласындағы бұдан да терең алшақтыққа итермелеуіне жол бере алмаймыз», – деді ол.
Гутерриш жиырмадан астам елдің, соның ішінде Қытайдың да, дамушы мемлекеттер үшін ЖИ саласындағы әлеуетті дамыту бойынша БҰҰ қолдайтын Тәжірибе алмасу және ынтымақтастық жөніндегі жаһандық желі құру туралы оның ұсынысына үн қосқанын хабарлады. Сонымен қатар, таяу уақытта ол Жаһандық жасанды интеллект қорын құру бойынша ұсыныстарды ұсынуды жоспарлап отыр.












