БҰҰ Бас хатшысының саяси мәселелер жөніндегі орынбасары Розмари ДиКарло Газада бірде-бір қауіпсіз орынның қалмағанын айтып, атысты дереу тоқтату қажет екенін мәлімдеді.
Еуразия Тудейдің IRNA агенттігіне сілтеме жасап хабарлауы бойынша, БҰҰ Бас хатшысының саяси мәселелер және бейбітшілікті нығайту жөніндегі орынбасары Розмари ДиКарло Қауіпсіздік Кеңесінің отырысында тамыздың 10 күні Израиль армиясының Әл-Табиин мектебіне әуе шабуылын жасағанын еске салды.
Палестиналық жергілікті дереккөздерінің хабарлауынша, шабуыл салдарынан ондаған палестиналық қаза тауып, көптеген адамдар, соның ішінде әйелдер мен балалар жарақат алған.
Розмари ДиКарло сөзінде: «БҰҰ Бас хатшысы палестиналық жүздеген босқын отбасы паналаған мектепке Израиль жасаған кезекті шабуылы салдарынан Газа секторындағы бейбіт тұрғындардың құрбан болуын қатаң айыптады»,- деді.
БҰҰ Бас хатшысы орынбасарының айтуынша, Газа секторында бірде-бір қауіпсіз орын қалмады. Алайда бейбіт тұрғындарға әрдайым басқа аудандарға баруға бұйрық беріліп келеді. Соғыс басталғаннан бері 10 ай өткен жағдайда аймақта шиеленістің өршу қаупі бұрынғыдан да айқын көрініп тұр.
БҰҰ-ның жоғары лауазымды тұлғасы атыс күн сайын жалғасып жатқанын айтып: «Мен Батыс жағалаудағы, соның ішінде Шығыс Иерусалимдегі оккупацияланған аудандардағы жағдайдың нашарлауына және жалғасып жатқан зорлық-зомбылыққа назар аударуға шақырамын. Сондай-ақ, мен БҰҰ Бас хатшысының ұзақ мерзімді бейбітшілік пен тұрақтылық орнату үшін аймақтық шиеленісті азайтуға күш салу туралы өтінішін тағы қайталаймын», — деді.
Гутерриштің көмекшісі сөзінің жалғасында: «Мен Мысыр, АҚШ және Қатардың екі тарапты да келісім жасасуға мәжбүрлеу жөніндегі күш-жігерін құптаймын. Бүгінде атысты тоқтату, кепілге алынғандарды босату және гуманитарлық көмек өте қажет»,- деді. Мысыр, Қатар және АҚШ басшылары Газа секторына қатысты бірлескен мәлімдемесінде енді уақытты босқа өткізуге болмайтынын атап өткен болатын.
БҰҰ Қауіпсіздік Кеңесі бүгін Алжирдің өтініші бойынша Израиль режимінің Әл-Табиин мектебіне жасаған шабуылын талқылау үшін жиналды.
Еске сала кетейік, тамыздың 10 күні Израиль қорғаныс күштері Газа секторындағы Әл-Табиин мектебіне әуеден соққы жасады. Соққы салдарынан шамамен 100 адам қаза тауып, ондаған адам жараланды. Әл-Табиин мектебінде соғыс салдарынан баспаналарын тастап кетуге мәжбүр болған палестиналықтар болған. Израильдің әуе шабуылы кезінде 200-ге жуық палестиналық намаз оқып жатқан. Сионистік режим мектепті бомбалау кезінде әрқайсысының салмағы 500 келіге жуық үш бомба қолданған.



















