Тәжікстанның астанасы Душанбе қаласында Имам Ағзам – Әбу Ханифа Нуман ибн Сабит атындағы Ислам институтының жаңа ғимараттары пайдалануға берілді.
Еуразия Тудейдің хабарлауы бойынша Душанбе қаласындағы Имам Ағзам – Әбу Ханифа атындағы Ислам институтының жаңа ғимараттары бүгін 21 тамызда пайдалануға берілді.
2500 шәкіртке арналған жаңа ғимараттар Тәжікстан тәуелсіздігінің 35 жылдығының құрметіне орай салынған.
Алты және сегіз қабаттық жеті ғимараттан тұратын нысан екі гектардан астам аумақта орналасқан.
Ғимараттардың жалпы ауданы 46 816 шаршы метрді құрайды. Бұл нысанның құрылыс жұмыстары 2019 жылы басталып, биыл 2025 жылы аяқталды.
Кешенде 513 орындық акт залы, 90 оқу кабинеті, кеңсе және басқа да қажетті үй-жайлар бар. Сондай-ақ, институтта 520 студентке арналған жатақхана дайындалған.
Институт ғимараттарының бірінде тәжік жеріндегі исламның бай тарихын, тәжік халқының ұлы ұстаздары мен ғұламаларының ғылыми рөлін және олардың ислам өркениетінің дамуына қосқан үлесін лайықты түрде көрсететін мұражай бар.
Мұражайда бірегей қолжазбалар, тарихи кітаптар мен белгілі тәжік ғалымдарының жазба еңбектері қойылған. Мұражай қорында тәжіктердің сәулет өнері мен мұсылман мәдениетінің мұрасын айғақтайтын тарихи жәдігерлер мен ескерткіштер де бар.
Олардың арасында қасиетті Құран Кәрімнің сирек көшірмелері, петроглифтер, каллиграфиялық тақталар және басқа да тарихи жәдігерлер қойылған.












