БҰҰ Бас хатшысы Антониу Гутерриш Израильдің Газа секторындағы Насер ауруханасына жасаған шабуылын қатаң айыптады.
Еуразия Тудейдің хабарлауы бойынша, шабуыл салдарынан бірнеше журналист пен бейбіт тұрғындар қаза тапты.
Ұлыбритания Сыртқы істер министрі Дэвид Лэмми Израильдің Газа секторындағы Насер ауруханасына жасаған шабуылына таңғалғанын айтып, медицина қызметкерлері мен журналистерді қорғауды қамтамасыз ету қажеттігін қуаттады.
Франция президенті Эммануэль Макрон да Израиль армиясының Газа секторында журналистер мен бейбіт тұрғындарды өлтіруін айыптады.
Германия Сыртқы істер министрлігі мәлімдеме жасап, болған оқиғаны тергеуге шақырды. Министрлік журналистердің қауіпсіздігін қамтамасыз ету қажеттігін баса айтты.
Швейцария Сыртқы істер министрлігі де Израильдің бұл әрекетін қатаң айыптады.
“Шекарасыз репортерлар” ұйымы Израильдің Газаға жасаған соққысы салдарынан журналистердің қаза табуын қатаң айыптап, БҰҰ Қауіпсіздік кеңесін Израильге қарсы шара қолдануға шақырды.
Израильдің Газа секторының оңтүстігіндегі Хан-Юнис қаласында орналасқан Насер ауруханасы маңына жасаған шабуылынан 20 адам, оның ішінде халықаралық БАҚ-та қызмет атқарған 5 журналист қаза тапты.
Қаза тапқандардың арасында Reuters агенттігінің операторы Хусам әл-Мисри, Al Jazeera телеарнасында жұмыс істеген Мохаммед Саламе, Associated Press-тің фриланс-журналисі Мерием Әбу Декка, сондай-ақ NBC News телеарнасының журналисі Муаз Абу Таха және журналист Ахмед Әбу Азиз бар.
Израиль армиясы шабуылды растап, журналистерді нысанаға алмағанын мәлімдеді.
2023 жылдың 7 қазанынан бері Газа секторындағы шабуылдардан 244 журналист қаза тапты.












