Ливанның “Хезболла” қозғалысы Израиль анықтай алмайтын жаңа дрондарын қолдана бастады.
Еуразия Тудейдің хабарлауы бойынша Хезболланың инновациялық дрондары Израильдің озық радиоэлектрондық күрес жүйелері мен танктерді қорғайтын белсенді жүйелерін сәтті айналып өтуде.
Сарапшылардың айтуынша, “Хезболланың” жоғары дәлдікпен көбірек қолдана бастаған бұл қаруы — оптикалық талшық арқылы басқарылатын (fiber-optic) дрон.
FPV дрондары ұзындығы 10-нан 30 шақырымға дейін жететін талшықты-оптикалық кабельдер арқылы басқарылады. Бұл радио сигналдарын немесе спутниктік байланысты қажет етпей, айтарлықтай қашықтыққа шабуыл жасауға мүмкіндік береді.
Дрондар сымсыз сигнал таратпайтындықтан, оларды анықтау өте қиын және олар радиоэлектрондық күрес пен байланыстың бұзылуына да төзімді.
«Хезболланың» өте тиімді жаңа қаруы миллиардтаған қаражат жұмсалатын Израильдің ең жаңа техникасынан әлдеқайда арзанға түседі.
CNN агенттігінің мәліметі бойынша жарылғыш зат тиелген төрт винтті квадрокоптер дрон бүгін, мамырдың төрті күні Оңтүстік Ливанның ғимараттарының үстінен ұшып, қирандылардың арасымен дәл қозғалып, тікелей бейне арқылы израильдік танк пен оның айналасындағы сарбаздарды нысанаға алғанда экранда «Жарылуға дайын» деген жазу көрінген.












