Иран халықаралық құқық аясында дипломатияны жалғастыруға дайын.
Еуразия Тудейдің хабарлауы бойынша, бұл туралы Иран Президенті Масуд Пезешкиан Түркия Президенті Режеп Тайып Ердоғанмен телефон арқылы сұхбатта мәлімдеді.
Масуд Пезешкиан аймақта бейбітшілік орнату үшін дипломатиялық үдерісті жалғастыру қажеттігін баса айтып: «Иран соғысты қалаған жоқ, қаламайды да. Заңсыз шабуылды Америка Құрама Штаттары мен Израиль жасады», — деді.
Түркия Президенті Режеп Тайып Ердоған мен Иран Президенті Масуд Пезешкиан сұхбат барысында екіжақты қарым-қатынасты, аймақ пен әлемдегі күн тәртібіндегі өзекті мәселелерді талқылады.
Түркия Президенті Ердоған Иран мен Америка Құрама Штаттары арасында қол жеткізілген келісімді оң бағалайтынын баса айтып, Анкараның дипломатиялық үдерістің тұрақты бейбітшілікпен аяқталуы үшін барынша қолдау көрсетуге дайын екенін қуаттады.
Сонымен қатар, Ердоған Тегеран мен Вашингтон арасындағы келіссөздер процесін бұзғысы келетін күштерге қатысты қырағылық таныту қажеттігін ескертті.
Ердоған аймақтағы бейбітшілік пен тұрақтылықты нығайту үшін бірлескен күш-жігерді жалғастыру қажеттігін мәлімдеп, Анкараның бұл процеске алдағы уақытта да белсенді үлес қоса беретінін мәлімдеді.
Сондай-ақ, тараптар сауда, қаржы және энергетика салаларындағы екіжақты байланысты одан әрі дамытуға уағдаласты.



















