Иран мен Ауғанстанның сауда айналымы екі миллиард долларға жетті.
Еуразия Тудейдің хабарлауы бойынша Ауғанстанның Өнеркәсіп және сауда министрлігі 2025 наурыз айының 22-нен соңғы жеті айға дейін Иранмен сауда айналымының құны 1 млрд 921 миллион долларға жеткенін мәлім етті.
Айналымдағы тауарлардың үлкен бөлігі азық түлік өнімдері мен құрылыс материалдарына және өнеркәсіптік тауарларға тиесілі. Сонымен қатар Иранмен импорт және экспорттың өсу үдерісі байқалғаны хабарланды. Ауғанстанның Пәкістанмен шекарасын жабуы сауда қысымын Иран бағытына қарай арттырды.
Мәскеудегі Талибан Үкіметінің елшісі Чабаһар айлағы Ауғанстанның сыртқы саудасындағы маңызды бағытқа айналып бара жатқанын, Кабул бұл бағытты одан әрі пайдалану үшін Иран мен Үндістанмен ынтымақтастықты нығайтып жатқанын мәлімдеді. Мәскеудегі Талибан елшісі Гол Хасан Хасан Солтүстік оңтүстік тасымал бағытының халықаралық үшінші форумында сөйлеген сөзінде Ауғанстанның Чабаһар бағытындағы сауда қаржы айналымы артқанын, бұл бағыттың Ауғанстанның саудадағы ескі, дәстүрлі бағыттарының орындарын алмастыра алатынын айтты.
Ол Ауғанстанның Иран мен Үндістан басшыларымен Чабаһар айлағын пайдалануды арттыру бойынша белсенді түрде ынтымақтастық жасайтынын, осы елдің Сауда министрі де Иран басшыларымен жуырдағы кездесуде осы айлақты пайдалануды арттыру жөнінде сұхбаттасқанын мәлімдеді.
Талибан Үкіметінің Мәскеудегі елшісі сөзін жалғап: «Бұрын басқа елдер арқылы өткен өзіміздің сауда бағыттарымызды Чабаһар бағытына ауыстыруды қалаймыз», — деді.
Айта кетейік, Талибанның бұл әрекеті Пәкістан Турхам және Чаман шекара өткелдерін жауып тастағаннан кейін жүзеге асырылуда. Аталған өткелдердің жабылуы мен Пәкістанмен сауда айналымының төмендеуі Ауғанстанды көршілес елдермен, әсірсе Иран және Үндістанмен сауда байланысын арттыруға итермеледі.
Систан мен Бәлучестандағы Чабаһар айлағы — Иранның оңтүстік-шығысындағы мұхитқа шығатын жалғыз айлақ. Бұл Ауғанстан үшін ерте замандардан азат суларға шығу үшін маңызды бағыт ретінде танылған.
Осы айлақ Иран темір жолы мен күре жолына қосылу арқылы Ауғанстан тауарларын халықаралық нарықтарға экспорттау мен импорттауға мүмкіндік береді.
Бұл айлақ сонымен қатар Азияның солтүстігі мен оңтүстігін қосушы және Ауғанстанның сауда бағыттарының орындарын алмастырушы саналады. Оның инфрақұрылымдық бағдарламалары соңғы жылдары Иран және Үндістанның серіктестігімен жүзеге асырылуда.












