Иран мен Оман Ормұз комитетінің алғашқы отырысын өткізіп, бұғазды басқару мәселелерін талқылады.
Еуразия Тудейдің хабарлауы бойынша, іс-шара екі мемлекеттің стратегиялық су жолындағы егемендік құқықтарын нығайтуға бағытталған.
Бұл туралы Иран Сыртқы істер министрінің құқықтық және халықаралық істер жөніндегі орынбасары Казем Ғарибабади кеше, дүйсенбі күні әлеуметтік желідегі парақшасында жазды. Ғарибабадидің айтуы бойынша, кездесу оның Масқатқа сапары барысында өтіп, оған Оман Сыртқы істер жөніндегі мемлекеттік министрі Абдулазиз әл-Хинай қатысқан.
Тараптар кездесуде Ормұз бұғазына қатысты өзекті мәселелер мен оны алдағы уақытта бірлесіп басқару жайын талқылады.
Казем Ғарибабади: «Кездесу барысында біз бұғазға қатысты ағымдағы мәселелерді қарастырып қана қоймай, Исламабад өзара түсіністік меморандумының бесінші тармағы мен жағалаудағы мемлекеттердің заңды құқықтары аясында оны басқару бойынша пікір алмастық», — деді.
Бұл отырыс Иран Ислам кеңесі Мәжілісінің төрағасы Мохаммад Бақер Қалибаф пен Сыртқы істер министрі Аббас Арақчидің Маскатқа сапарының қорытындысы бойынша 22 маусымда екі тарап жариялаған бірлескен мәлімдемеден кейін ұйымдастырылды.
Мәлімдемеде Оман Сұлтанаты мен Ислам Республикасы Ормұз бұғазына қатысты барлық уағдаластықтар жағалаудағы екі мемлекеттің егемендігі мен халықаралық құқықтарына толық сай келуі тиіс екенін баса атап өткен болатын.
Бұған дейін АҚШ пен Израиль тарапынан жасалған әскери және саяси қысымдардан кейін Иран осы бұғаз арқылы өтетін кейбір кемелердің қозғалысына шектеу қойған болатын.
АҚШ президенті Дональд Трамп 7 сәуірде жарияланған бітімгершілік шарттарын бұзып, Иран кемелері мен порттарын теңіз блокадасында ұстауды жалғастыратынын мәлімдегеннен кейін Тегеран бұл су жолындағы бақылауды едәуір күшейтті.
Жуырда осы шиеленіс салдарынан туындаған тығырықтан шығу мақсатында Пәкістанның делдалдығымен Тегеран мен Вашингтон арасында өзара түсіністік меморандумына қол қойылды. Құжаттың бесінші тармағында Иранның осы стратегиялық маңызы зор өткелдегі егемендік құқығын тану қажеттілігі баса айтылған.
Саяси дағдарыс басталғаннан кейін Иран мен Оман жағалаудағы мемлекеттер ретінде халықаралық құқыққа сай, бұл су жолын алдағы уақытта бірлесіп басқару бойынша келіссөздерді белсенді түрде бастады.












