Иран Шанхай ынтымақтастық ұйымына мүше елдермен Америка Құрама Штаттарына қарсы тұрудағы тәжірибесімен бөлісуге дайын екенін мәлімдеді.
Еуразия Тудейдің хабарлауы бойынша, бұл туралы Иран Қорғаныс министрінің орынбасары Реза Талаи Ник мәлімдеді.
Реза Талаи Ник Бішкек қаласындағы Шанхай ынтымақтастық ұйымына мүше мемлекеттердің Қорғаныс министрлерінің кездесуінде: «Бүгінгі таңда Иран Ислам Республикасы қуатты қорғанысқа да, қарулы күштердің қажеттіліктерін қамтамасыз етуге де дайын. Сонымен қатар, қорғаныс мүмкіндіктерін басқа елдермен, әсіресе Шанхай ынтымақтастық ұйымына мүше мемлекеттермен бөлісуге ниетті», — деді.
Иран Қорғаныс министрі орынбасарының айтуы бойынша, Иран Ислам Республикасы ұйымға мүше мемлекеттерге Америка Құрама Штаттарына тойтарыс беру ісіндегі жинақтаған тәжірибесімен бөлісуге дайын.
Айта кетейік, кеше, 27 сәуір күні Иран Қорғаныс министрінің орынбасары генерал-майор Реза Талаи Ник Шанхай ынтымақтастық ұйымына мүше мемлекеттердің Қорғаныс министрлері кеңесіне қатысу үшін Қырғызстанға келді.
Реза Талаи Никті Қырғыз Республикасы Қарулы күштері Әуе қорғанысы күштерінің қолбасшысы генерал-майор Талантбек Талипов қарсы алды.
Шанхай ынтымақтастық ұйымына мүше мемлекеттердің Қорғаныс министрлерінің кездесуі Бішкек қаласындағы «Ала-Арча» мелекеттік резиденциясында өтті.












