Израильдің Ұлттық қауіпсіздік министрі Итамар Бен-Гвирдің Палестинаны жақтаушы «Ас-Сумуд» («Global Sumud») флотилиясының ұсталған белсенділеріне көрсеткен қарым-қатынасы халықаралық деңгейде үлкен дау тудырды. Оның бұл әрекетін Еуропалық Одақ пен Америка Құрама Штаттары қатаң айыптады.
Халықаралық реакция және шет елдердің мәлімдемелері
Министрдің әлеуметтік желіде жариялаған бейнежазбасынан кейін батыс елдері жаппай наразылық білдірді. Кеше, сәрсенбі, 20 мамыр күні бірнеше мемлекет Израиль елшілерін шақыртып, түсініктеме талап етті.
АҚШ: Демократ-сенатор Джефф Меркли бейсенбі күні таңертең өзінің Facebook парақшасында: «Бен-Гвирдің қамаудағыларға қарым-қатынасы жиіркенішті және адамгершілікке жатпайды. Ғазадағы қираған қоғам мен шарасыз отбасылардың суреттерін көргенде, халықтың неліктен әрекет етуге шақырылып жатқанын түсінеміз», — деп жазды.
Германия: «Spiegel» басылымының мәліметінше, Германия Сыртқы істер министрі Йоханн Вадефул ұсталған белсенділерге қатыгездік танытуды мүлдем қабылданбайтын әрекет деп атады.
Польша: Сыртқы істер министрі Радослав Сикорский X (бұрынғы Twitter) желісінде ұсталғандардың арасында Польша азаматтары да бар екенін айтып, шұғыл мәлімдеме жасады: «Ешқандай қылмыс жасамаған Польша азаматтарына бұлай қарауға болмайды. Демократиялық әлемде тұтқындарды қинау, мазақ етіп табалау — қалыпты жағдай емес. Біз азаматтарымыз үшін әділдікті және бұл әрекеттің тиісті салдары болуын талап етеміз».
Франция: Сыртқы істер министрі Жан-Ноэль Барро Израиль елшісін министрлікке шақыртып, наразылық нотасын табыстады. Ол өз сөзінде: «Министр Бен-Гвир мырзаның бұл іс-әрекетін тіпті Израиль үкіметіндегі өз әріптестері де айыптады. Бұл мүлдем қабылданбайды», — деді.
Сондай-ақ, Нидерланды, Италия, Канада, Бельгия және Португалия билігі Израиль елшілерін шақыртса, Испания өзінің сенімді өкілі арқылы наразылық білдірді.
Даудың басы неден басталды?
Шулы бейнежазбаны Итамар Бен-Гвир X платформасындағы парақшасында жариялады. Видеода Ғаза секторына бет алған жерінде Израиль әскери-теңіз күштері тарапынан ұсталған «Сумуд» гуманитарлық флотилиясының мүшелері көрсетілген. Белсенділерді Ашдод айлағында қолдарын артына байлап, бастарын жерге игізіп, тізерлетіп қойған. Министр Бен-Гвирдің олардың арасында Израиль туын ұстап жүріп, еврей тілінде: «Израильге қош келдіңдер! Мұнда біз қожайынбыз!» деп айқайлағаны таспаға түскен.
«Сумуд» флотилиясы туралы анықтама
Бүкіләлемдік «Сумуд» флотилиясы (немесе Бүкіләлемдік бостандық флотилиясы) — Ғаза секторындағы Израиль тарапынан енгізілген қоршауды бұзып өтуді мақсат еткен халықаралық теңіз бастамасы.
Бұл гуманитарлық миссия 2025 жылдың шілде айында «Бостандық флотилиясы» коалициясы, «Ғазаға бүкіләлемдік жорық» және басқа да бірнеше қоғамдық ұйымдардың бірігуімен құрылған. Флотилия құрамында 44-тен астам елдің 500-ден астам белсендісі бар 40-қа жуық кеме жұмылдырылған. Бұл тарихтағы ең ірі азаматтық гуманитарлық конвой болып табылады.












