Duolingo мобильді қосымшасы жыл сайынғы кезекті есебінде әлем бойынша пайдаланушылардың 2023 жылы қандай тілдерді үйренгені туралы деректерді сараптап, орыс тіліне деген қызығушылықтың төмендегенін атаған.
«Duolingo Language Report 2023» талдау қорытындысы бойынша дәстүрлі түрде ағылшын тілі көш бастады.
Әлемде адамдардың үйренуге ынтық тілдер рейтингісінің алғашқы ондығына ағылшын тілінен кейін испан, француз, неміс, жапон, корей, италиян, хинди, қытай және португал тілдері кіреді.
Ағылшын тілі 122 елде ең танымал шет тілдері арасында бірінші орынды иеленді.
Кейінгі жылдары ағылшын тіліне Азиядағы шәкірттер көбірек қызығушылық білдіре бастапты. Duolingo мобильді қосымшасы жариялаған рейтингте португал тілі орыс тілін ығыстырған. ХХ ғасырдан бері әлемдегі қарқынды таралушы тілдердің бірі болған орыс тілінің бүгінде халықаралық деңгейде қолданылуы шектелуде. Тұрақты түрде Топ-10 қатарынан табылған орыс тілінің ахуалы былтырдан бері өзгерді. 2022 жылғы қазаннан биылғы қазан аралығында орыс тіліне сұраныс күрт төмендеген. Сарапшылардың пікірінше, бұл аса маңызды 2 мәдени бетбұрысты көрсетеді.
Біріншіден, орыс тіліне деген әлемдегі сұраныс Украинадағы соғыс салдарынан құлдыраса, екіншіден, халықаралық қоғамдастық, соның ішінде туристер тарапынан да Бразилия мен Португалияға деген қызығушылық артқан. «Duolingo Language Report 2023» есебінің мәліметінше, Украинадағы соғыс салдарынан орыс тілі құлдыраса, алайда украин тілі алға озып шыққан.
Duolingo аға ғылыми қызметкері, доктор Синди Бланконың айтуы бойынша, Украинадағы қақтығыс әлемде украин тіліне деген қызығушылық туғызды. Жұрт Ресейге төтеп берген Украина болмысын тілі арқылы түсінуге тырысқан.
Синди Бланко мәліметінше, 2023 жылы украин тілін барынша көп азаматы үйреніп жүрген елдердің көш басында АҚШ, Ұлыбритания, Польша және Ресей тұр.
Duolingo есебінде 13 жасқа дейінгі оқушылар туралы мәліметтер кірмеген.
Өкінішке орай, бұл сервисте қазақ тілі оқытылмайтындықтан Duolingo есебінде қазақ тілі туралы ештеңе айтылмаған.
Айта кетсек, дүниежүзіндегі ең танымал Duolingo мобильді қосымшасы арқылы адамдар негізгі тілдерді тегін меңгере алады.
Дереккөзі: Madan.org












