Дмитрий Медведев Батыс елдерінің отаршылдық жүйе аясында өз үстемдігін сақтауға тырысып жатқанын мәлімдеді.
Еуразия Тудейдің хабарлауы бойынша, бұл туралы Ресей Федерациясы Қауіпсіздік Кеңесі төрағасының орынбасары Дмитрий Медведев «БРИКС плюс» аясында өткен «Единая Россия» партияаралық форумының «Көпполярлы әлем үшін жаһандық көпшілік» пленарлық отырысында мәлімдеді.
Дмитрий Медведев сөйлеген сөзінде: «Бірқатар елдер, ең алдымен Батыс елдері, осы уақытқа дейін қолданыста болған жүйені сақтап қалу үшін күш-жігер жұмсауда. Олар осының арқасында өздерінің үстемдігін сақтап қалуға тырысып жатыр. Батыстың көздегені материалдық, табиғи, адами ресурстар, қолдарынан келгеннің бәрінен ақша табу және осылайша ғасырлар бойы қалыптасқан отаршылдық жүйе мен бүкіл әлемге өз шарттарын белгілеу мүмкіндігін сақтап қалу», — деді.
Ресей Федерациясы Қауіпсіздік Кеңесі төрағасының орынбасары отаршылдық қанау заманы аяқталса да, отаршылдардың ұрпақтары бұл жүйені жалғастыруға тырысып жатқанын айтты. Медведевтің айтуынша, Батыс елдерінің бұл тәжірибелері олардың экономикалық саясатында, әсіресе санкция саясатында көрініс табуда.
Медведев сөзінің жалғасында: «Кез келген халықаралық шектеулерге тек халықаралық ұйымдар, атап айтқанда БҰҰ Жарғысы рұқсат бере алады. Бірақ мұндай шектеулер орын алуда», -деді.
Ол сондай-ақ мұндай тәртіп бүкіл әлемдік қоғамдастыққа кері әсерін тигізіп, әлемдік экономиканың өсуін, тауар ағындарының қозғалысын бәсеңдетіп, логистиканы нашарлататынын атап өтті.
Медведев: «Біз әлемдік тәртіп ретінде сипатталған Батыс елдерінің игілігіне арналған ережелерге қарсы тұруымыз керек. Сондықтан адамзатты өткеннің осы қалдықтарымен бірлесіп күресуге шақырамыз», — деп сөзін қорытындылады.



















