Венесуэланың қазіргі басшысы Николас Мадуро кеше, шілденің 28, жексенбі күні өткен президент сайлауында жеңіске жетті.
Еуразия Тудейдің хабарлауы бойынша бұл туралы Боливар Республикасының Ұлттық сайлау кеңесінің төрағасы Элвис Аморосо хабарлады.
Дауыстардың 80 пайызының нәтижесі бойынша, Мадуроның сайлауда 51,2 дауысқа қол жеткізгені белгілі болды.
Мадуроның басты бәсекелесі, әсіре оңшыл партиялардың кандидаты Эдмундо Гонсалес 4 445 978 сайлаушының немесе дауыс бергендердің 44,2 пайызының дауысына ие болған. Сайлаушылардың 4,6 пайызы қалған сегіз қатысушыға дауыс берді.
Еске салайық, Мадуро осымен қатарынан үшінші рет президент болып сайланып отыр. Оның инаугурациясы 10 қаңтарда өтеді. Өкілеттігі алты жыл болады.
Венесуэладағы президент сайлауына 100-ден астам елден 910 бақылаушы қатысқан. Елде сайлауға қатысу көрсеткіші 59 пайызды құраған. Дегенмен оппозиция дауыстың санау нәтижесімен келіспей, нәтижелер 2018 жылғы соңғы сайлаудағыдай бұрмаланған деп санайды. Оппозиция жетекшісі Мария Корина Мачадо Мадуроның қарсыласы Гонсалес қазіргі президентті басымдықпен жеңді деп қуаттады.
Айта кетейік, Венесуэлада президент сайлауы кеше, 28 шілдеде өтті. Бұл күні Аргентина, Коста-Рика, Эквадор, Панама, Парагвай, Перу және Уругвай бақылаушылардың көмегімен дауыстарды ашық санауды талап етіп, мәлімдеме жасады.
Венесуэла Сыртқы істер министрлігі Латын Америкасының тоғыз елін, атап айтқанда Аргентина, Коста-Рика, Эквадор, Гватемала, Панама, Парагвай, Перу, Уругвай және Доминикан Республикасын сайлау процесіне араласты деп айыптады.
BBC АҚШ Мемлекеттік хатшысы Энтони Блинкеннің АҚШ жарияланған нәтижелер Венесуэла халқының ерік-жігері мен дауысын көрсетпейтініне қатты алаңдайтынын айтқанын жазды.
The New York Times газетіндегі мәлімет бойынша Америка Құрама Штаттары Венесуэла президенті Николас Мадуроның отставкаға кетуіне бірқатар себепке байланысты, соның ішінде бұл елдің аумағында орасан зор мұнай қорының болуы және Венесуэладан солтүстікке қарай мигранттар ағынын тоқтату қажеттілігіне байланысты мүдделі.












