Иран Президенті Масуд Пезешкиан бүгінде әлемге бейбітшілік пен бауырластық керек екенін, сол себепті екіжақты қарым-қатынасты дамыту қажеттігін баса айтты.
Еуразия Тудейдің хабарлауы бойынша, Масуд Пезешкиан бұл туралы кеше, жұма күні Түркіменстанға жұмыс сапарының жалғасында осы елдің Президенті Сердар Бердімұхамедовпен кездесуінде мәлімдеді.
Масуд Пезешкиан кездесуде Иран Ислам Республикасының принципті саясатына, сондай-ақ, елінің жоғарғы көшбасшысы Әли Хаменеидің көрші елдермен, соның ішінде Түркіменстанмен байланысты дамыту туралы сөзін басты назарға алып: «Біз көршіміз, бізді ұзын ортақ шекара біріктіреді. Көрші ел болумен қатар, біз туыспыз»,- деді.
Ол бүгінде әлемге бейбітшілік пен бауырластық қажет екенін айтып: «Біз аймақта махаббат пен бауырластықта өмір сүріп, екіжақты қарым-қатынасты дамытуымыз керек»,-деп қуаттады.
Пезешкиан Мақтымқұлы Фрағының туғанына 300 жыл толуына арналған халықаралық салтанатты шара туралы: «Бүгін біз бұл іс-шараның өте сәтті өткеніне куә болдық. Оның аймақ пен әлем үшін жолдауы өте құнды және мағыналы», — деп баса айтты.
Осы кездесуде Түркіменстан Президенті Сердар Бердімұхамедов Пезешкианның Мақтымқұлы Фрағының туғанына 300 жыл толуына арналған салтанатты шараға қатысқанына тоқталып: «Біздің шақыруымызды қабыл алып, конференцияға қатысқаныңыз үшін алғыс айтамыз», — деп ризалығын білдірді.
Сердар Бердімұхамедов Иран президентінің осы іс-шарадағы сөйлеген сөзін құнды деп атап: «Бүгін сіз өте мағыналы сөз айттыңыз»,- деді.



















