«СУР-САЗ» этно-ансамблінің «Қазақ-үнді әуендерінің үндестігі» атты әдеби-сазды кеші өтті.
Қазақстан халықтарының бірлігі күні қарсаңында және Үндістан мен Қазақстанның мәдениет және білім саласындағы ынтымақтастығына 20 жыл толуына орай мәдени кеш жүректерді жақындататын, рухты тербейтін ерекше өнер мерекесі болды.
Іс-шара екі елдің бай музыкалық мұрасын, жүрекке жақын әуендерін, ортақ адамгершілік құндылықтарын насихаттайтын тамаша алаңға айналды. Кештен көрермендер қазақ және үнді әуендерінің үндестігіне куә болып қайтты.
Қазақ және үнді халықтары – тарихы терең, дәстүрі бай, өнерге деген құрметі зор халықтар. Өнер кеші осы рухани үндестіктің айқын көрінісі болды.
«СУР-САЗ» этно-ансамблі өнер көрсеткен «Қазақ-үнді әуендерінің үндестігі» атты әдеби-сазды кеш №92 Махатма Ганди атындағы мамандандырылған лицейде өтті.
Шығыстану факультетіндегі үндітану бөлімінің ұйымдастыруымен өткен аталмыш мәдени шара Үндістанның Қазақстандағы Елшілігінің, Астанадағы Свами Вивекананда мәдени орталығының қолдауымен жүзеге асырылды.
Кешке ҚР-дағы Үндістанның Төтенше және Өкілетті Елшісі др. Т.В. Нагендра Прасад мырза, Үндістан Елшілігінің Алматыдағы Бас Консулы Суапнил Ктохаваде мырза, Үндістан елшілігі жанындағы Свами Вивекананда үнді мәдени орталығының директоры Налини Сингал ханым, Иран Ислам Республикасының Алматыдағы Мәдени өкілдігінің директоры Хосейн Ағазаде, Иранның Ұлттық кітапханасы директорының орынбасары, ғалым Мустафа Нури, Шығыстану факультетінің деканы Ем Наталья Борисқызы, №92 Махатма Ганди атындағы мамандандырылған лицей директоры Шажабаева Күлжан Сауытқызы және үнді бизнес қауымдастығының өкілдері, университеттің оқытушы-профессорлық құрамы қатысты.
Шығыстану факультетінің өнерлі студенттерінен құралған «СУР-САЗ» этно-ансамбліне шығыстану факультеті, үндітану бөлімінің оқытушысы, доктор Исмагулова Сымбат жетекшілік етеді.












