АҚШ президенті Дональд Трамп Қазақстанды өзінің екінші мерзімінде “Ибраһим келісімдеріне” қосылған алғашқы ел деп атады.
Еуразия Тудейдің хабарлауы бойынша Ақ үйдегі кездесу барысында Қазақстан мен АҚШ президенттері Израиль Премьер-министрі Беньямин Нетаньяхумен телефон арқылы сөйлесті.
Қазақстан Республикасының «Ибраһим келісімдеріне» қосылуы әңгімелесудің арқауы болды.
Ақорданың мәліметі бойынша “Ибраһим келісімдеріне” қосылу арқылы Қазақстан қақтығысты еңсеруге, диалогты ілгерілетуге және БҰҰ Жарғысы негізіндегі халықаралық құқықты қолдауға үлес қосады.
Қазақстанның бұл шешімі ешбір мемлекетпен екіжақты қатынастағы міндеттемелеріне нұқсан келтірмейді. Бұл – бейбітшілік пен қауіпсіздікті нығайтуды көздеген көпжақты дипломатияның заңды жалғасы әрі нақты көрінісі.
АҚШ президенті Дональд Трамп Қазақстанның “Ибраһим келісімдеріне” қосылу туралы шешімін жоғары бағалап, бұл қадам өзге елдерді аталған бастаманы қолдауға үндейтінін атап өтті.
Дональд Трамп: «Бұл – бүкіл әлемде ынтымақтастық орнатуда айтарлықтай алға ілгерілеу. Бүгінде көптеген ел Ибраһим келісімдері арқылы бейбітшілік пен өркендеу жолын таңдап отыр”, – деді.
Айта кетейік, “Ибраһим келісімдері” — Израиль мен араб және мұсылман елдері арасындағы ынтымақтастықты дамытуға бағытталған АҚШ-ның 2020 жылғы дипломатиялық бастамасы.
Еврейлермен ресми түрде қарым-қатынас орнатқан Біріккен Араб Әмірліктері, Бахрейн, Судан және Мароккоға енді Қазақстан қосылады деп күтілуде.
Америка Құрама Штаттарының делдалдығымен жасалған келісімдер Израиль мен осы мемлекеттер арасындағы қарым-қатынастың қалыпқа келуінің, соның ішінде толық дипломатиялық, сауда және мәдени байланыстың орнауының бастамасы болды.
Келісім яһуди, мәсихи және ислам діндерінде ортақ құрметтелетін Ибраһим пайғамбардың есімімен аталған.












