Биыл қасиетті Құрбан айт 6 маусымда басталады.
Еуразия Тудейдің ҚМДБ сайтындағы мәліметке сілтеме жасап хабарлауы бойынша бұл туралы Астанада Қазақстан мұсылмандары діни басқармасының төрағасы, Бас мүфти Наурызбай қажы Тағанұлы бүгін Құрбан айт мерекесіне байланысты өткізген баспасөз мәслихатында мәлім етті.
Бас мүфти Наурызбай қажы Тағанұлы: «Алла қаласа, биыл қасиетті Құрбан айт мерекесі 6 маусымда басталады. Қазақстан мұсылмандары діни басқармасы бірқатар алыс та жақын мұсылман елдерінің ғұламаларымен, пәтуа шығару орталықтарымен кеңесіп, осындай пәтуа қабылдады”, — деді.
Наурызбай қажы Тағанұлы бүгін қасиетті зұлхижжа айы басталғанын айтып: “Осы айдың алғашқы он күнінде барынша ынтамен ғибадат етіп, көбірек ізгі істер мен жақсы амалдар жасауға тырысқан абзал. Өйткені, қасиетті хадис-шарифтерде осы айда орындалған игі істердің сауабы еселеніп жазылатыны айтылған», — деді.












