Қазақстандық инфекционист ғалым Зәуреш Жұмаділова Қазақстанда ешқандай америкалық биозертхана жоқ екенін баса айтты.
«Кабар» агенттігінің хабарлауы бойынша, жуырда Бішкек қаласында осы мәселені көтерген «Орталық Азия елдерінің биологиялық қауіпсіздікті қамтамасыз ету және эпидемиологиялық жағдайды бақылаудағы ынтымақтастық перспективалары» тақырыбында дөңгелек үстел өтті.
Пікірталас форматында өткен шарада соңғы жылдары әлеуметтік желілерде Қазақстан аумағында орналасқан америкалық биозертханалар туралы таралған дерек төңірегінде мәселе көтерілді. Бұл туралы ҚР Денсаулық сақтау министрлігіне қарасты Масғұт Айқымбаев атындағы аса қауіпті инфекциялар ұлттық ғылыми орталығының бас директоры Зәуреш Жұмаділова пікір білдірді.
«Қазақстанда ешқандай америкалық биозертхана жоқ. Біздің барлық зертханаларымыз – қазақстандық. Олар баршаға ашық, яғни онда келуге болады. Екінші мәселе, ол Қазақстан Республикасындағы биоқауіпсіздікті қамтамасыз ету бойынша құзыретті орган, елдегі бүкіл осындай зертханалар желісін бақылайтын Денсаулық сақтау министрлігі арқылы аккредиттеудің белгілі процедураларынан өту қажет. Біз шетел азаматтарының отандық ғылыми-зерттеу нысандарымызда еркін жүруіне жол бере алмаймыз. Бұл туралы бұған дейін де бірнеше рет айтылды», — деді Зәуреш Жұмаділова.
Сарапшы адамзат үнемі түрлі биологиялық қатерлермен күресіп келе жатқанына тоқталып, көптеген вирустың бұрыннан белгілі екенін және олардың жақсы зерттелгенін, алайда жаңа вирустардың да пайда болатынын ескертіп: «Халыққа әлі де қатер бар. Біз биологиялық қатердің алдын алу тұрғысында Орталық Азия мемлекеттерімен белсенді жұмыс істеуге дайынбыз», — деді.
Халықаралық қатынастар бойынша сарапшы Байқадам Құрамаев Қазақстан билігінің ұстанымын алға тартып, қазақстандық зертханалардың барлық қызметі тек бейбіт сипатқа ие екендігіне тоқталды. Сарапшының айтуынша, бүгінде Қырғызстан үшін биоқауіпсіздік бойынша заң жобасын қабылдауға қатысты жұмыс жүргізілуде. Сарапшы осы орайда Қазақстанның тәжірибесі мен әріптестігінің маңызды екенін атап өтті.
Қырғыз саясаттанушысы Бакыт Бакетаев талқылау барысында Қазақстанның БҰҰ аясында Аурулар мен биологиялық қауіпсіздікті бақылау жөніндегі өңірлік орталықтар желісін құру туралы идеясын қолдайтынын айтты.
Айта кетейік, Қырғызстанның «Ой Ордо» сарапшылық бастамалар орталығы мен Жогорку Кенеш төрағасы жанындағы Климаттың өзгеруі контекстіндегі орнықты даму жөніндегі кеңес бірлесіп ұйымдастырған іс-шара барысында биологиялық қарудың таралу қатерлері талқыланып, қауіп-қатерлерге қарсы тұру тек мемлекетаралық ынтымақтастық арқылы ғана жүзеге асатыны атап өтілді.












