Сауд Арабиясы Корольдігінің Сыртқы істер министрі Фейсал бен Фархан БҰҰ-на реформа жасау қажет екенін мәлімдеді.
Еуразия Тудейдің WAS агенттігіне сілтеме жасап хабарлауы бойынша, бұл туралы Фейсал бен Фархан Нью-Йоркте Біріккен Ұлттар Ұйымы Бас Ассамблеясының 79-шы сессиясында Сауд Арабиясының Королі Абдулазиз бен Салман Әл Сауд атынан сөйлеген сөзінде айтты.
Фейсал бен Фархан: «Сауд Арабиясы жарқын болашаққа бет бұру керек деп нық сенеді. Біз қазіргі және болашақтағы сын-қатерлерді шешуге көбірек әсер ететін, бейбітшілік пен қауіпсіздікті дамытуға үлес қосатын, болашақ ұрпақ үшін тұрақты дамуды қолдау үшін жан-жақты күш-жігерді нығайтудың маңыздылығына баса назар аударамыз. Әлемде бейбітшілік орнатудағы, әсіресе Батыс Азиядағы соғысқа қатысты халықаралық сәтсіздіктердің жалғасуы болашақ Жарғыны сынақтан өткізеді», — деді.
Сауд Арабиясы Корольдігінің Сыртқы істер министрі сөзінің жалғасында: «Геосаяси соғыстар мен қақтығыстар елдер арасындағы даму алшақтығын арттырып, ұлттар арасындағы байланысты әлсіретті.
Қиындықтарға қарсы тұру және әлем халықтарының қажеттіліктерін қанағаттандыру екі есе жаһандық күш-жігерді қажет етеді. Осыған байланысты Сауд Арабиясы Біріккен Ұлттар Ұйымын халықаралық ережелер мен заңдарды күшейтуде және ұжымдық күш-жігерді нығайтуда қолдайды», -деді.
Сауд Арабиясының Сыртқы істер министрі климаттың өзгеруіне де тоқталып, сын-қатерлермен елінің ұлттық және аймақтық жағдайлар мен мүмкіндіктердегі айырмашылықтарды ескеріп, өзара әрекеттесудің маңыздылығын жақтайтынын мәлімдеді.
Фейсал бен Фархан: «Энергияны түрлендіру үш басты тірекке негізделуі керек. Олар: энергетикалық қауіпсіздік, экономикалық өркендеу және климаттың өзгеруінің салдарын шешу. Олардың бірінсіз екіншісін жасау мүмкін емес»,- деп сөзін түйіндеді.












