Сирия күрдтері Иран күрдтеріне Америкадан абай болуды ескертті.
Сирия күрдтері Иран күрдтеріне ескерту жасап: «Америка сіздерді жалғыз қалдырады» деді.
Сирияның солтүстік-шығысындағы күрд белсенділері мен тұрғындары аймақтағы оқиғаларға тоқталып, Иран күрдтерінің Тегеранға қарсы қақтығыстарда Уашиңгтонмен одақтасуына қатысты ескерту жасады. Олар Сирия күрдтерінің АҚШ-пен ынтымақтастықтағы ащы тәжірибесі Иран күрдтері үшін сабақ болуы тиіс екенін баса айтты.
Jerusalem Post басылымының хабарлауынша, АҚШ пен Израильдің Иранға әуе соққылары күшейген тұста Ирактың солтүстігінде орналасқан күрд қарулы топтары Уашиңгтонмен Иранның батысындағы Ислам Республикасының күштеріне шабуыл жасау мүмкіндігін талқылаған. Бұл жағдай Сирия күрдтері арасында Ирандағы қандастарының тағдырына қатысты алаңдаушылық туғызды.
Қамишли қаласының тұрғындары Сирия күрдтерінің ДАИШ-ке қарсы соғыста АҚШ-пен жұмыс істеп, автономиялық аймақ құрғанын, бірақ соңында дағдарыс ортасында жалғыз қалғанын еске салды. Қамишли тұрғыны Саад Али былай деді: «Иран күрдтері АҚШ-пен одақтаспайды деп үміттенемін, өйткені АҚШ оларды тастап кетеді. Егер ертең АҚШ пен ирандықтар арасында келісім болса, сіздерді құрбан етеді. Біздің қателігімізді қайталамаңыздар».
Тағы бір тұрғын Амджад Кардо: «Иран күрдтері Иран жеріндегі ешқандай соғысқа АҚШ-тан жазбаша әрі нақты кепілдік алмай тұрып кірмеуі керек», — деді.
Сириядағы Күрд прогрессивті демократиялық партиясының төрағасы Ахмед Баракат та Иран күрдтерін өте сақ болуға шақырды.
Бұл ескертулер АҚШ президенті Дональд Трамптың күрдтердің Иранға кіруін алғашында тамаша деп атап, кейін ұстанымын өзгертіп, күрдтер Иранмен соғысқа кірмеуі керек деген мәлімдемесінен кейін айтылып отыр.












