Тәжікстан астанасының экономикалық көрсеткіштері 2025 жылы айтарлықтай артты.
Еуразия Тудейдің хабарлауы бойынша, бұл туралы Тәжікстан Президенті Эмомали Рахмонның төрағалығымен өткен Үкіметтің кеңейтілген отырысында айтылды.
Жиында 2025 жылғы әлеуметтік-экономикалық даму қорытындылары бойынша Тәжікстан астанасының жалпы өңірлік өнімі 8,3 пайызға ұлғайып, қала бюджеті межеленген жоспардан 22,2 пайызға асыра орындалғаны айтылды.
Өткен жылы Душанбе қаласында 46 мың жаңа жұмыс орны ашылды. Сондай-ақ, қалада 62 жаңа өнеркәсіптік кәсіпорын пайдалануға берілді. Бұл өндірістік қуаттарды кеңейтуге және өнеркәсіп өндірісінің өсуін қамтамасыз етуге мүмкіндік берді. Қалалық билік органдарының мәліметінше, 2025 жылы негізгі капиталға салынған инвестициялар көлемі 2024 жылмен салыстырғанда 31 пайызға артқан.
Тәжікстан Премьер-министрі Кохир Расулзода Үкімет отырысында сөйлеген сөзінде өткен жыл Тәжікстан үшін табысты жыл болғанын айтты.


















