Талибан жақында Катарда БҰҰ-ның жетекшілігімен Ауғанстан туралы өтетін отырысқа өз делегациясы қатысатынын растады.
Еуразия Тудейдің ИСНА агенттігіне сілтеме жасап хабарлауынша, бұл биыл Катардың астанасы Дохада БҰҰ ұйымдастыратын Ауғанстан дағдарысына қатысты үшінші отырыс болмақ.
Associated Press агенттігінің мәліметі бойынша Талибан бірінші отырысқа шақырылмаған. БҰҰ-ның Бас хатшысы Антониу Гуттериш олар ақпан айындағы екінші отырыс үшін қабылдауға келмейтін шарт қойғанын, соның ішінде Ауғанстанның азаматтық қоғам мүшелері келіссөздерден шеттетіліп, осы топпен аталған елдің заңды билеушілері ретінде қатынас жасалсын деген талап қойғанын айтқан.
Ауғанстан СІМ де Талибан үкіметінің аға баспасөз хатшысы Забихалла Моджаһедтің жексенбі күні басталатын екі күндік отырыста Талибан делегациясын басқаратынын жариялады.
Аталған министрлік сонымен қатар Доха басқосуының стратегиясы Ауғанстан СІМ Амирхан Моттақидің басшылығымен өткен отырыста талқыланғанын, онда бірнеше тақырып, соның ішінде Ауғанстанның қаржы және банк жүйесіне салынған халықаралық шектеулер, жеке сектордың дамуы алдындағы түйткілдер, сонымен бірге есірткі заттар контрабандасына қарсы мемлекеттік шаралар қарастырылғанын мәлімдеді.
Талибан 2021 жылдың тамыз айында Америка мен НАТО коалициясы күштерінің Ауғанстаннан шығуымен бір мезгілде осы елдегі билікті қолға алды. Бүгінде ешбір ел Ауғанстандағы Талибан билігін ресми түрде мойындаған жоқ.












