Түркі ақпарат агенттіктерінің альянсы (Alliance of Turkic News Agencies-ATNA) құрылды. Оның құрамына QAZCONTENT АҚ (Қазақстан), Anadolu Ajansı (Түркия), AZERTAC (Әзербайжан), KABAR (Қырғызстан), UZA (Өзбекстан) Халықаралық ақпарат агенттіктері кірді.
Ыстамбұл қаласында өткен «БАҚ-тағы бірлік және болашаққа деген көзқарас» тақырыбындағы медиа саммиті барысында бес елдің медиа құрылымдарының басшылары арасында Түркі ақпарат агенттіктерінің альянсын құру туралы декларацияға қол қойылды.
Шарада Түркияның «Анадолу» ақпарат агенттігінің бас директоры Сердар Қарағез, Қырғызстанның «Кабар» ақпарат агенттігінің директоры Медербек Шерметалиев, Қазақстан «Қазконтент» медиахолдингінің басқарма төрағасы Бекзат Жүсіп, Өзбекстан Ұлттық ақпарат агенттігінің (UzA) бас директоры Абдусаид Кучимов, сондай-ақ Түркия Президенті Әкімшілігінің Байланыс бөлімінің меңгерушісі Фахреттин Альтун, Түркі мемлекеттері ұйымының Бас хатшысы Кубаничбек Омуралиев және басқа да жоғары мәртебелі қонақтар қатысты.
ATNA төрағасы лауазымына басқарма басшысы және «Анадолу» ақпарат агенттігінің бас директоры Сердар Қарағез сайланды. Ол ақпараттық саладағы байланыстарды арттырудың маңыздылығын және түркі халықтары арасындағы лингвистикалық қауымдастықтың маңыздылығын атап өтіп: «Біз түркі тілдерінің интеграциялық күшіне сенеміз», — деді.
«Біздің мақсатымыз — түркі ақпарат агенттіктерінің ортақ тілі, жұмысы мен көзқарасын біріктіретін жетекші қауымдастық құру»,- деді Сердар Қарағез.
«Qazcontent» АҚ басқарма төрағасы Бекзат Жүсіп түркі елдері арасында БАҚ саласындағы байланыс жыл сайын нығайып келе жатқандығын атап өтті.
«Телеарналар арасында ынтымақтастық орнап, өзара контент алмасу басталды. Атап айтқанда, бірлескен тележобалар мен сериалдардың жарық көруі осының айғағы. Ақпарат агенттіктер арасында байланыс тапшылығы жоқ. Дегенмен қазір жаңа медиа дәуірі. Демек, біз интернет-журналистика саласындағы ынтымақтастықты әрқашан жаңа деңгейге көтеруіміз керек»,- деді Бекзат Жүсіп.



















