Иран мен Ауғанстан ғалымдары Тәжікстан Президенті Эмомали Рахмонның «бабалар әліпбиін» оқытуды жақсарту туралы тапсырмасына үн қосып, көне парсы жазуын зерттеу мен оқуға көмектесуге әзірліктерін мәлімдеді.
Еуразия Тудейдің хабарлауы бойынша, бұл туралы парсы тілінің бір топ оқытушысы мен зерттеушілері Тәжікстан Президенті Эмомали Рахмонның жуырда елдегі барлық оқу орындарында «бабалар әліпбиін» оқыту сапасын арттыру туралы берген тапсырмасына орай мәлімдеді.
Кеңес үкіметі тұсында саяси қысыммен алдымен латынға, кейін кириллицаға күштеп көшіріліп, тәжік тілі деп қайта аталған бұл тілдік мұраны жаңғырту парсы тілдес халықтардың ортақ мәдени бірегейлігін сақтаудағы маңызды тарихи қадам болмақ.
Тәжікстан, Иран және Ауғанстан ғалымдарының өзара ынтымақтастығы оқу материалдарын дайындауға, ғылыми зерттеулерді дамытуға және көне жазуды оқыту әдістемесін жетілдіруге септігін тигізбек.
Бұған дейін Эмомали Рахмон тиісті ведомстволарға республиканың білім беру мекемелерінде тарихи әліпбиді оқытуды жақсарту бойынша шара қабылдауды тапсырып, оның ұлттық бірегейлік пен мәдени дәстүрлерді сақтаудағы маңызын қуаттаған болатын.
Айта кетейік, 1926 жылы КСРО-дағы түркі тілдес халықтардың әліпбиін латын графикасына ауыстыру туралы шешім қабылданып, бұл бағдарламаға тәжіктер де қосылды.
Кеңес үкіметі 1929 жылы араб-парсы жазуын қолдануға бүкіл ел аумағында тыйым салды.
1930 жылы Тәжікстан үшін алғашқы латын әліпбиі дайындалды. Оның негізгі нұсқасын Абдуррауф Фитрат пен Александр Фрейман әзірледі.
Сталиндік биліктің орталықтандыру саясаты басталған соң, латындандыру бағдарламасы тоқтатылды.
1938 жылы КСРО Ғылым академиясының тәжік секторындағы тіл мамандары күтпеген жерден «латын әліпбиі тәжік халқының мәдени дамуына кедергі келтіреді» деген қорытындыға келді.
Тәжікстан мұғалімдерінің съезінде ел басшылығына латын әліпбиінен кириллица графикасына көшу туралы ұжымдық өтініш жолданды.
Тәжік КСР Жоғарғы Кеңесі 1940 жылғы мамыр айында «Тәжік жазуын латындандырылған әліпбиден кириллица графикасы негізіндегі жаңа тәжік әліпбиіне көшіру туралы» заң қабылдады.
1941 жылғы қыркүйек айында Тәжікстанда кириллица әліпбиі ресми түрде қолданысқа еніп, қазіргі таңға дейін қолданылып келеді.












