Қытайда соңғы 60 жылда болмаған аптап ыстық орын алып, халықты әбігерге салды.
CNN-нің хабарлауынша, соңғы 6 айда елде рекордтық температура тіркелді. Ұлттық климат орталығының мәлімдемесі бойынша биыл Қытайда өткен жылдарға қарағанда аптап ыстық орын алды.
Қытайдың метеорологиялық басқармасының хабарлауынша, елде 40 градустан асатын ыстық ауа температурасы бірнеше күн бойы сақталады. Басқарманың мәліметінше, елде аптап ыстықтың орын алуы Эль-Нинодағы ауа-райына байланысты болып отыр. Сондықтан елдің оңтүстігінде жаз айларында жауын-шашын, ал солтүстігінде құрғақшылық орын алады.
Хэбэй провинциясында термометр бағаны 39 градусқа жетіп отыр. Хэбэй провинциясында аптап ыстыққа байланысты қауіптің қызыл деңгейі жарияланды. Сондай-ақ провинцияның кейбір қалаларында термометр бағаны 42 градусқа жетуі мүмкін.
Еске сала кетсек, табиғаттың тосын мінезінен Қытай экономикасына былтырғы жылы шілде айында 400 миллион доллар шығын келген. Шанхайдың Янцзы аймағын және Қытайдың оңтүстік-батысында орналасқан Сычуань провинциясын бірнеше апта бойғы қатты ыстық салдарынан құрғақшылық жайлады.
Сычуаньдағы 40 градустық ыстық пен жауын-шашынның аз түсуі электр энергиясының жетіспеушілігіне әкеп соқтырған. Сондықтан провинция билігі кейбір өнеркәсіп орындарын электрмен жабдықтауды шектеуге мәжбүр болған еді.



















