Астанаға 24 қаңтар күні ресми сапармен келген Башқұртстан басшысы Радий Хабиров Мемлекет басшысы Қасым-Жомарт Тоқаевтың қабылдауында болды.
Радий Хабиров Sputnik Қазақстан агенттігінің тілшісімен сұхбатта кездесуде қандай мәселелер талқыланғаны туралы ойымен бөлісті.
«Біз ортақ мәдениетіміз бен тарихымызға сүйене отырып, Қазақстанның біз үшін әлемдегі басты серіктес екенін айтқым келеді. Біз кездесу барысында бірнеше жылды қамтыған қорытындыларымызды талқыладық», — деп бастады сұхбатын Радий Хабиров.
Башқұртстан басшысы кездесуде Қазақстан мен Башқұртстанның инвестициялық заңнама мәселелері талқыланғанын айтты.
«Қазақстанда Инвестициялық штаб, бізде Инвестициялық кеңес бар. Біз үшін басты міндет – бизнес үшін преференциялар мен қолайлы жағдайлар жасау.
Биыл Қазақстанда инвестицияның өсу қарқыны 14 пайызды құрады, бізде аз.
Сондықтан біз бұл мәселеде Қазақстанның тәжірибесінен үйренгіміз келетінін Қасым-Жомарт Тоқаевпен кездесуде айттым.
Мәдени-гуманитарлық ынтымақтастық мәселелері де талқыланды.
Бізде «Башқұрттың ұзақ өмір сүруі. Туризм» атты бағдарлама бар. Бұл бағдарлама бүгінде елімізден тыс жерлерде жүзеге асырыла бастады.
Алғашқы тәжірибе Беларусь елінде қолданылды. Биыл соны Қазақстанда жүзеге асырғымыз келеді. Ардагерлер үшін 700 квота бөлінді. Сапар қаражаты Башқұртстан Республикасының бюджеті есебінен жүргізіледі.
Биылғы жылы Қазақстан-Ресей өңіраралық форумы Уфада өтетіні белгілі.
Өткен жылы біз Ресей-Беларусь ынтымақтастығының өңіраралық X мерейтойлық форумын өткіздік. Сондықтан да біздің бұл салада тәжірибеміз бар», — деп атап өтті Башқұртстан басшысы.
Қазақстанға келгісі келетін башқұрт туристері үшін бүгінде әуе рейстерінің саны жеткіліксіз екенін атап өткен Башқұртстан басшысы:
«Қарым-қатынас, байланыс инфрақұрылымы тиімді болуы үшін Башқұртстан қосымша рейстер санын іске қосуға дайын.
Башқұртстан туристері Алматыға көбірек қызығушылық танытуда», — деді.
Башқұртстанның Астанада сауда үйін ашуды жоспарлап отырғаны жөнінде қойылған тілші сауалына Радий Хабиров:
«Қазіргі таңда бюрократиялық процедуралар аяқталды. Астанада жеткілікті алаңдар бар, сондықтан құрылыс ғимаратын салудың қажеті жоқ.
Үш айдың ішінде біз сауда үйінің орнын анықтаймыз деп ойлаймын. Сауда үйінде Башқұртстанның өнімдері ұсынылатын болады. Жеңіл өнеркәсіптен тамақ өнімдеріне дейін», — деп атап өтті Башқұртстан басшысы.
Еске сала кетсек, 23 қаңтар күні Башқұртстан басшысы Радий Хабиров Астанаға «Қазақстан-Башқұртстан» халықаралық форумына қатысу мақсатында ресми сапармен келді. Бизнес форумға Қазақстаннан 400 кәсіпорын және Башқұртстаннан 70 кәсіпорын өкілдері қатысты.
Дереккөзі: Sputnik Қазақстан












