Дүниежүзілік денсаулық сақтау ұйымы адамдардың өмірін құтқару мақсатындағы екі миссиясында соңғы екі күнде Газаның оңтүстігіндегі Насер ауруханасынан 32 ауыр науқас, соның ішінде екі бала жеткізілгенін хабарлады.
Бұл туралы Синьхуа агенттігі хабарлады.
ДДҰ өкілі Тарик Джазаревич Женевада өткен баспасөз брифингінде 130-ға жуық науқас және жарақат алған пациент пен кем дегенде 15 дәрігердің ауруханада жатқанын мәлімдеді. Оның айтуынша кешенде су да, жарық та жоқ, антисанитариялық жағдай қалыптасқан.
Дүниежүзілік денсаулық сақтау ұйымының өкілі олардың қауіпсіздігі мен жағдайына алаңдаушылық білдірді.
Хан Юнистегі Насер ауруханасы аймақтағы шайқастар мен бір аптаға созылған қоршаудан кейін 14 ақпанда Хамас тобы кепілге алғандардың қалдықтарын іздеген Израиль әскерлерінің рейдіне байланысты жұмысын тоқтатты.
Arab News басылымы сейсенбі күнгі хабарында ДДҰ-ның мәліметіне сілтеме жасап, бұл Газа секторындағы екінші үлкен аурухана екенін еске салды.
Arab News басылымы Израильдің Хамасты ауруханаларды жауынгерлердің жасырынатын жері ретінде пайдаланды деп айыптағанын хабарлады. Хамас бұл айыптауларды жоққа шығарды.
Газа секторындағы палестиналық және исламшыл топтар, соның ішінде Хамас 2023 жылдың 7 қазанында Израильге шабуыл жасап, Израильдің оңтүстігінің бір бөлігін басып алды. Израиль де 2023 жылдың 1 желтоқсанында Газа секторына басып кіргенде Хан Юнис қаласы мен оның айналасында басталған ұрыс әлі жалғасып жатыр.












