Сербия Президенті Александр Вучич телефон арқылы сұхбатта Қазақстан Президенті Қасым-Жомарт Тоқаевты Белградқа сапармен келуге шақырды.
Ақорданың хабарлауынша 2024 жылғы 20 ақпанда Мемлекет басшысы Сербия Президентімен телефон арқылы сөйлесті.
Сербия тарапының бастамасымен өткен сұхбат барысында саяси және сауда-экономикалық ынтымақтастықтың қазіргі жай-күйі мен даму перспективалары талқыланды.
Тараптар іскерлік байланыстарды нығайтуға, сондай-ақ өнеркәсіп, ауыл шаруашылығы, көлік және логистика салаларындағы бірлескен инвестициялық жобаларды жүзеге асыруға өзара мүдделі екенін айтты.
Сонымен қатар екі ел басшылары орнықты дамуды қамтамасыз етуге, жаһандық бейбітшілік пен қауіпсіздікті ілгерілетуге қатысты сындарлы диалогты жалғастыруға дайын екенін растай отырып, халықаралық күн тәртібіндегі бірқатар өзекті мәселе жөнінде пікір алмасты.
Қазақстан-Сербия екіжақты қарым-қатынасы 1996 жылы 10 желтоқсанда орнатылды. 2015 жылдың маусым айында Белградта Қазақстанның Елшілігі, 2011 жылдың 23 маусымында Астанада Сербия Елшілігі жұмысын бастады.













