Израильдің 14-арнасы Нетаньяху мен Трамп арасындағы келіспеушілікті Тегеранды адастыру амалы деп атады.
Израильдің қауіпсіздік саласындағы аға сарапшысының айтуынша, Трамп пен Нетаньяху арасындағы Иран мәліметіне қатысты шиеленісті телефон қоңыраулары туралы тараған ақпараттар шындыққа жанаспайды. Бұл Тегеранды адастыру үшін алдын ала мұқият жоспарланған стратегияның бір бөлігі болған.
Еуразия Тудейдің хабарлауынша, Израильдің 14-арнасы Ұлттық қауіпсіздікті зерттеу институтының (INSS) және Мисгав институтының аға ғылыми қызметкері Коби Майклдың сөзіне сілтеме жасап мәлімдеме жариялады. Оның айтуынша, АҚШ Президенті Дональд Трамп пен Израиль Премьер-министрі Биньямин Нетаньяху арасындағы Иран саясатына қатысты терең қайшылықты көрсететін қызу әрі шиеленісті келіссөздер туралы ақпараттардың қасақана таратылуы — Тегеран басшылығын беймәлім жағдайда қалдыруды көздеген стратегиялық айла-амал.
Дау-дамай «Axios» ақпарат порталының жарияланымынан басталды. Онда АҚШ-тың Пәкістан арқылы Иранға жолдаған жаңа ұсынысы төңірегінде Трамп пен Нетаньяху арасында өте ауыр телефон сұхбат болғаны айтылды. Ақпаратқа сәйкес, Нетаньяху АҚШ ұсынған негіздемені үзілді-кесілді қабылдамай, Тегерандағы биліктің инфрақұрылымын жою үшін қайтадан әскери іс-қимыл жасауды талап еткен. Ал америкалық дереккөзі Нетаньяхудың ашуын сипаттап келе, оның ызадан дегбірі қашып, мазасызданғанын айтқан.
Сонымен қатар, басқа да мәліметтерде Израиль басшыларының Вашингтон мен Тегеран арасындағы байланыстан мүлдем шеттетілген, әсіресе Нетаньяхудың соғыс алдындағы Иран билігін құлату үшін бірлескен әскери науқан жүргізу туралы өтінішінің орындалмағаны айтылды.
Алайда, Майкл мұның тамаша тактикалық алдау екенін былай түсіндірді: «Президент Трамптың да, Премьер-министр Нетаньяхудың да нақты дағдарысқа ешқандай мүдделілігі жоқ. Олардың арасындағы дағдарыс туралы оқиғаны таратылуы салдарынан ирандықтар келесі әскери соққының уақытынан мүлдем бейхабар болып, оған тұтқиылдан тап болуы мүмкін».
Израильдік зерттеуші сөзін былай жалғастырды: «Бұл ақпараттың тарап кетуі екі лидер арасында келіспеушілік бар деген түсінік қалыптастырды. Сонымен қатар бұл жағдай Трампты Нетаньяхудың ауыр қысымына қарамастан, дипломатияға тағы мүмкіндік беріп отырған басшы ретінде көрсетті. Трамп ирандықтардың кім екенін өте жақсы біледі».
Хабарламаға сәйкес, бұл алдаудың соңғы кезеңі «үйлестіру кезеңі» деп аталған тағы бір телефон қоңырауынан кейін аяқталды. Осы қоңырау барысында Трамп Премьер-министрге нақты әрі екіұдайлылықсыз кепілдік берген. Трамп Нетаньяхуға Иранмен жасалатын кез келген түпкілікті келісімде Тегеранның ядролық бағдарламасын толық және түпкілікті жою туралы келіссөзге келмейтін шарт қамтылатынын анық түсіндірді.
Бұдан бөлек, АҚШ Президенті Израильдің барлық шептегі қатерлерге қарсы өзін-өзі қорғауға, соның ішінде Ливанда әскери операция немесе іс-қимыл бастауға толық құқығы бар екенін қайтадан қуаттады.
Осыдан кейін Нетаньяху үнсіздігін бұзып, Ақ үймен толық ынтымақтастықты көрсету және Тегеранға сес көрсету мақсатында Х (бұрынғы Twitter) әлеуметтік желісінде ресми мәлімдеме жариялады:
«Біздің арамыздағы және екі ел арасындағы серіктестік шайқас даласында дәлелденген әрі ешқашан қазіргідей мықты болған емес. Менің саясатым Президент Трамптың саясаты сияқты өзгермейді: Иранда ядролық қару болмайды».
Израильдік БАҚ Нетаньяху мен Трамп арасындағы келіспеушіліктің толығыымен қолдан жасалғанын және алдау операциясының бөлігі екенін түсіндіре келе, қауіпсіздікті үйлестірумен қатар АҚШ Израильді дипломатиялық байланыстың барысы туралы мұқият хабардар етіп отырғанын айтты. Ресми мәлімдемеге сәйкес, бұл байланыс Ормұз бұғазын қайта ашуға және қалған даулы мәселелер бойынша түпкілікті келісімге қол жеткізу келіссөздеріне бағытталған өзара түсіністік меморандумын әзірлеуге негізделген. Нетаньяху Трампқа Израиль қауіпсіздігіне деген ерекше адалдығы үшін алғыс айтты.
Майкл бұл мәлімдеменің жариялануын барлау операциясының соңғы нүктесі деп түсіндірді: «Нетаньяхудың Трамппен байланысы туралы осы жазбасын алдау оқиғасының толық аяқталуы және екі ел арасындағы алшақтық пен үйлесімсіздік туралы барлық айыптауға жауап ретінде қарастыруға болады. Бұл қадам Израильдің қоғамдық пікірін АҚШ-пен бәрі толық үйлестірілгенін және дипломатиялық өзгеріс ақыр соңында Израиль мүддесіне қызмет ететінін түсіндіру үшін жасалған».
Мәліметтің қорытындысында Нетаньяху мен Трамптың медиа кеңістікке ақпарат таратуды толыққанды жедел қару ретінде пайдаланғаны анықталды. «АҚШ Нетаньяхуды тежеп « және «Пәкістан арқылы ымыраға келу жолын іздеуде» деген жалған бейне қалыптастыру Иран басшылығының дипломатиялық уақытымыз бар және Батыс майданында іріткі түсті деп сенуі үшін жасалған. Толық үйлестірудің ашылуы іс жүзінде бірлескен әскери соққы немесе Иранның тізе бүгу келісімі үшін инфрақұрылымның бірлесіп құрылғанын дәлелдейді. Бұл іс-қимыл Иранды барлау тұрғысынан әлсіз жағдайда қалдырып, майдандағы жедел тұтқиылдан соққы беру мүмкіндігін арттырады.












