2300-ден астам радикалды сионист қоныстанушы Әл-Ақса мешітіне баса-көктеп кірді.
Еуразия Тудейдің хабарлауы бойынша бүгін таңертеңнен бері мыңдаған сионист Израиль басқыншы күштерінің қатаң қорғауымен және Итамар Бен-Гвирдің сүйемелдеуімен 150 адамнан тұратын топтармен Әл-Ақса мешітіне басып кірді.
Құдыстағы Ислами уақып министрлігі бүгін таңертеңнен бері 2300-ден астам радикалды қоныстанушының Израиль басқыншы күштерінің қатаң қорғауымен және Итамар Бен-Гвирдің сүйемелдеуімен «Ғибадатхананың қираған күні» деп аталатын ойдан шығарылған датаға орай Әл-Ақса мешітіне баса-көктеп кіргенін хабарлады. Сионистік әскерилердің қолдауымен бұл сан тағы артады деп күтілуде.
Құдыс және Әл-Ақса мешіті істері жөніндегі сарапшы, доктор Абдулла Маруф қоныстанушылардың мешітке басып кіруі және олардың шақыруларының жалғасуы туралы былай деді:
«Қоныстанушылар Әл-Ақса мешітіне басып кіру үшін 5000 қатысушыны жинауға шақырды. Бұл осы мешіт тарихындағы ең үлкен шабуыл болмақ. Радикалды «Ғибадатхана» топтары жыл сайын бұл атаулы күнді Әл-Ақса мешітіне қарсы әрекеттерді шиеленістіру жолындағы негізгі тірек әрі маңызды кезең ретінде пайдаланады. Бұл күні аталған топтар кез келген жолмен алаңда өздерінің бар екенін әрі пәрменін дәлелдеуге тырысады және мешіт пен қаланың (Иерусалимнің) қазіргі мәртебесіне ауқымды өзгерістер енгізуді талап етеді».
Ол сонымен қатар биылғы жылдың өткен жылдардан айырмашылығы бар екенін, өйткені бұл оқиғаның Газадағы геноцидтік соғыстан кейінгі Израильдегі алғашқы сайлауалды науқан қарсаңында өтіп жатқанын айтты.
Сионист әскерилер Әл-Ақса мешітінің кіреберістері мен Ескі қаланың айналасында қатаң шектеу шараларын енгізіп, мешіт аулаларына орналасып, құлшылық етуге келетін мұсылмандардың енуіне кедергі жасады. Сол себепті, таңғы намаз уақытында Әл-Ақса мешітіне тек шектеулі сандағы мұсылмандар ғана кіріп, намаз оқыды. Осыдан кейін басқыншы күштер бірқатар азамат пен намазхандарды соққыға жықты.
Қоныстанушылар басып кіру барысында талмұдтық жоралғыларды орындауды жалғастырды.
«Ғибадатхана» деп аталатын радикалды топтар өз жақтастарын Әл-Ақса мешітіне жинауды әлі де жалғастырып, бүгінгі заңсыз әрекеттерге қатысушылардың санын барынша көбейтуді көздейді.
Сионистік режимнің Ішкі қауіпсіздік министрі Итамар Бен-Гвир мен Кнессеттегі «Ликуд» партиясының депутаты Амит Халеви де Әл-Ақса мешітіне басып кірушілердің қатарында болды.
Бұрын-соңды болмаған әрі қауіпті әрекет ретінде басқыншы режим күштері Әл-Ақса мешітінің ішіне заңсыз басып кірген қоныстанушылар үшін арнайы лапастар орнатты.
Қоныстанушылар арандатушылық әрекет ретінде Әл-Ақса мешітінің ауласын қорлап, «Қуббат ас-Сахра» мешітінің алдында сионистік басқыншы режимнің туын көтерді.












