Қытайдың Шэньчжэнь қаласында алғашқы ірі Қазақстан-Қытай бизнес-форумы өтті.
Сауда және интеграция министрлігі таратқан мәліметке сәйкес, Қытайдың ірі экономикалық және өнеркәсіптік орталығы Шэньчжэньдің 200-ден астам ірі кәсіпкерлері Қазақстан-Қытай бірінші бизнес-форумына қатысты.
Қазақстан-Қытай саудаға жәрдемдесу қауымдастығы мен Shenzhen Cross Supply Service Association бірлесіп ұйымдастырған іс-шара Қазақстанның инвестициялық мүмкіндіктерімен танысу үшін әлеуеті мол қытайлық инвесторларды жинады.
Форумның ашылуында ҚР Премьер-Министрдің орынбасары –сауда және интеграция министрі Серік Жұманғарин екі ел халықтары арасында қалыптасқан тығыс байланыстарын атап өтті.
Вице-премьер Қазақстанға келетін инвестициялардың негізгі үш бағытын айқындады. Біріншісі — инфрақұрылымды, жүктеу-түсіру орталықтарын, қолданыстағы және жаңа бағыттарды ашуды, дамытуды қамтитын логистика бағыты. Осы бағыт ірі көлік операторлары үшін ерекше қызығушылық тудырады.
Инвестициялардың екінші бағыты — өнімді терең өңдеу.
Үшінші бағыт — Қазақстанның ауыл шаруашылығы.
Қазақстан мен ҚХР арасындағы өзара сауда 2022 жылы рекордтық көрсеткіштерге қол жеткізіп, $24,1 млрд-қа жетті, оның ішінде қазақстандық өнімнің Қытайға экспорты үштен бірінен астамға өсіп, $13,2 млрд құрады. Импорт 33,5%-ға өсіп, $11,0 млрд құрады. Елдер арасындағы сауда-саттық 2023 жылдың бірінші жартыжылдығында 20,5%-ға артып, 13,6 млрд. АҚШ долларын құрады: оның ішінде 6,3 млрд. АҚШ доллары қазақстандық экспортқа тиесілі.



















