«Amanat» партиясы атынан Мемлекет басшысына Премьер-Министрдің кандидатурасы ұсынылды.
Ақорданың хабарлауынша 2024 жылғы 6 ақпанда Президент Қасым-Жомарт Тоқаевқа Парламент Мәжілісінің және «Amanat» партиясының төрағасы Ерлан Қошанов «Amanat» партиясының атынан Премьер-Министр қызметіне Олжас Бектеновтың кандидатурасын ұсынды.
Қолданыстағы заңнамаға сәйкес, Мемлекет басшысы ұсынылған кандидатураны Мәжілістегі партиялардың фракцияларымен жуық арада талқылайды.
Айта кетейік, «Аманат» партиясы — 1999 жылы Президент Нұрсұлтан Назарбаевтің бастамасымен «Отан» партиясы атымен құрылған, 2022 жылға дейін «Nur Otan» атымен танымал болған Қазақстанның ең ірі, әрі доминантты саяси партиясы.
Қазақстан Республикасы Президенті Әкімшілігінің Басшысы Бектенов Олжас Абайұлы 1980 жылы 13 желтоқсанда Алматы қаласында дүниеге келген.
Қазақ мемлекеттік заң академиясын заңгер мамандығы бойынша бітірген.
Еңбек жолын 2002 жылы Алматы қаласы Әділет басқармасы бөлімінің бас маманы ретінде бастаған.
2005-2006 жылдары – ҚР Премьер-Министрі Кеңсесінде заң бөлімінің сарапшысы, бас сарапшысы.
2006-2009 жылдары – ҚР Президентінің Әкімшілігінде қызмет істеді.
2009-2012 жылдары – ҚР Әділет министрлігінің Тіркеу қызметі және құқықтық көмек көрсету комитеті төрағасының орынбасары.
2012-2014 жылдары – ҚР Экономикалық қылмысқа жəне сыбайлас жемқорлыққа қарсы агенттігінің (қаржы полициясы) орталық аппаратында департамент бастығы.
2015-2016 жылдары – Астана қаласы әкімінің аппарат басшысы, ҚР Президенті Әкімшілігінің Басшысы хатшылығының меңгерушісі.
2016-2017 жылдары – Сыбайлас жемқорлыққа қарсы іс-қимыл Ұлттық бюросының (Сыбайлас жемқорлыққа қарсы қызмет) Астана қаласы бойынша департаментінің басшысы.
2017-2018 жылдары – Ақмола облысы әкімінің орынбасары.
2018-2019 жылдары – ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары.
2019-2022 жылдары – ҚР Сыбайлас жемқорлыққа қарсы іс-қимыл агенттігі төрағасының бірінші орынбасары.
2022 жылдың ақпанынан 2023 жылдың сәуіріне дейін – Қазақстан Республикасының Сыбайлас жемқорлыққа қарсы іс-қимыл агенттігінің төрағасы.
2023 жылғы 3 сәуірде Мемлекет басшысының Жарлығымен Қазақстан Республикасы Президенті Әкімшілігінің Басшысы болып тағайындалды.
Еске салайық, кеше, 5 ақпан күні Қазақстан Республикасының Үкіметі орнынан түсті.
Бұл туралы Қаулы Ақорданың сайтында жарияланды.
Қазақстан Республикасының Президенті Қасым Жомарт Тоқаев кеше, 2024 жылғы 5 ақпан күнгі Қаулыға сәйкес Қазақстан Республикасы Үкіметінің орнынан түсуін қабылдап, Премьер-Министрдің міндеттерін Роман Васильевич Склярға уақытша жүктеді.












