Қазақстан Бішкек жылу электр орталығындағы ірі жарылысқа көмек қолын созып, Жамбыл ГРЭС-інен Қырғызстанға жіберілетін электр энергиясының жеткізілімін күрт арттырды.
ҚР СІМ хабарлауынша, бұл жөнінде Қазақстан Премьер-министрінің орынбасары – Сыртқы істер министрі Мұрат Нұртілеу Қырғыз Республикасының Сыртқы істер министрі Жээнбек Кулубаевпен телефон арқылы сұхбаты барысында талқыланды.
Сұхбат барысында Мұрат Нұртілеу қырғыз әріптесіне Қазақстан Президенті Қасым-Жомарт Тоқаевтың Бішкек қаласының ЖЭО-сындағы апатқа қатысты жағдайды реттеуге жәрдемдесуге тапсырма бергенін жеткізді. Тараптар телефон арқылы жәрдемді үйлестіру бойынша екіжақты өзара іс-қимыл мәселелері туралы пікір алмасты.
Жээнбек Кулубаев ЖЭО жұмысын қалпына келтіру бойынша елінде қабылданып жатқан шараларға тоқталып, Қазақстанның Жамбыл МАЭС-пен электр энергиясын жеткізу көлемін арттыруға байланысты мәселені жедел шешкені үшін алғысын білдірді.
Еске сала кетсек, 2 ақпан күні Қырғызстан астанасы Бішкек қаласында жылу электр орталығында ірі апат болды. Қайғылы оқиғадан 5 адам зардап шекті. Оның үшеуі ауруханаға жатқызылса, екі адам ауруханаға жатудан бас тартқан.











