Еуроодақтың авиациялық қауіпсіздік комитеті Парсы шығанағы маңындағы бес араб елінің акваториясы үстінен ұшуға қатысты қауіпсіздік ескертуінің мерзімін ұзартты.
Еуразия Тудейдің хабарлауы бойынша Еуропалық Одақтың авиациялық қауіпсіздік агенттігі тасымалдаушы компанияларға Бахрейн, Кувейт, Катар, Біріккен Араб Әмірліктері және Оман жағалауларындағы Парсы шығанағы суларының бетімен ұшудан сақ болу туралы талабын 16 қарашаға дейін созды.
Бұл шектеу биылғы шілдеде алғаш енгізілгеннен бері екінші мәрте ұзартылып отыр. Бастапқы кезеңде Парсы шығанағы ынтымақтастық кеңесіне кіретін мемлекеттердің бүкіл әуе кеңістігін, барлық биіктік пен эшелондарды қамтыған қатаң ескерту кейін, яғни тамыз айында түзетіліп, тек Парсы шығанағы мен Оман теңізінің су айдындарымен ғана шектелген болатын.
Аталмыш ескерту Еуропаның ұшу қауіпсіздігі стандарттарына бағынатын барлық ЕО әуе тасымалдаушыларына, сондай-ақ Еуропалық Одақ аумағына ұшып шығатын, баратын немесе оның әуе кеңістігі арқылы транзитпен өтетін аталған агенттіктің ресми рұқсаты бар еуропалық емес әуе компанияларының бәріне ортақ қолданылады.












