Біріккен Ұлттар Ұйымының Бас хатшысы Антониу Гутерриш Йемендегі қақтығыстың ушығып тұрғанын ескертті.
Еуразия Тудейдің Біріккен Ұлттар Ұйымының ресми сайты келтірген мәліметке сілтеме жасап хабарлауы бойынша, бұл туралы Антониу Гутерриш Нью-Йоркте Йемендегі жағдай жөнінде өткізген брифингтен кейін журналистерге айтты.
Антониу Гутерриш: “Йемендегі шиеленіс біраз уақыттан бері жалғасып келеді. Шығыс провинцияларда болып жатқан жаңа оқиғалар отқа май құйғандай жағдайды ушықтыра түсуде”, — деді.
Бас хатшы осы айдың басында Оңтүстік өтпелі кеңеспен байланысы бар күштердің Хадрамаут пен Әл-Маһра провинцияларында алға жылжығанын баса айтты.
Оның айтуы бойынша, мұндай біржақты әрекеттер ауқымды эскалация мен одан әрі фрагментация қаупін арттырады.
Гутерриш ұрыс-қимылдардың қайта басталуы аймақтағы бейбітшілік пен қауіпсіздікке, соның ішінде Қызыл теңізде, Аден шығанағында және Африка мүйісінде ауыр салдары болуы мүмкін екенін ескертті.
Біріккен Ұлттар Ұйымының Бас хатшысы барлық тарапты барынша ұстамдылық танытуға, шиеленісті азайтуға және келіспеушіліктерді диалог арқылы шешуге шақырды. Ол бұл үндеу өңірлік қатысушыларға да қатысты екенін баса айтты. Сонымен қатар, Бас хатшы Йеменнің егемендігі мен аумақтық тұтастығы сақталуы тиіс екенін қуаттап, қақтығысты тоқтататын тұрақты, келісілген саяси реттеу қажет екенін айтты.
Гутерриш сөзінің соңында: “Йемен халқы бейбітшілікті талап етеді. Олар соған лайық”, — деді.


















