Израиль Парламентінің UNRWA қызметіне тыйым салатын заң қабылдағанына қарамастан, ұйым өз миссиясын орындауды жалғастыруда.
Еуразия Тудейдің хабарлауы бойынша, бұл туралы брифингте БҰҰ басшысының баспасөз хатшысы Стефан Дюжаррик мәлімдеді.
Стефан Дюжаррик: “Біз аймақтағы әріптестерімізбен байланыстамыз. Олар миссиясын орындап, қызметтерін жалғастыруда. Басып алынған Батыс жағалау мен Шығыс Иерусалимдегі UNRWA клиникалары жұмыс істеп жатыр. Газа секторында гуманитарлық операциялар жалғасуда.
UNRWA аймақта қалуға және өз миссиясын орындауға бел байлады. БҰҰ туы ұйым нысандарында желбіреп тұр”, -деді.
Дюжаррик Нетзарим дәлізі дүйсенбі күні ашылғаннан кейін қоныс аударған палестиналықтардың Газаның солтүстігіне оралуын жалғастырып жатқанын мәлімдеді. Ұйым өкілінің айтуынша, қазірдің өзінде оңтүстіктен солтүстікке 462 мыңнан астам адам оралды.
Дюжаррик: “Солтүстіктен оңтүстікке қарай да қозғалыс бар. Бірақ бұл көрсеткіш аз. Эксклавтың оңтүстік аймақтарына 1400-ге жуық адам оралды”,- деді.
Дюжаррик Иордан өзенінің Батыс жағалауындағы Израиль армиясының жалғасып жатқан операцияларына назар аударып: “Өткен жылдың желтоқсан айынан бері аймақта 30 адам Израиль армиясының құрбаны болды”,- деді.
Дюжаррик БҰҰ бейбіт тұрғындардың өлімі мен азаматтық инфрақұрылымға жасалған шабуылдарды айыптайтынын баса айтты.
Израиль Кнессетінің UNRWA қызметіне тыйым салатын заңдары бейсенбі күні күшіне енді. Оларды жүзеге асыру ұйымның басып алынған Палестина территориясындағы жұмысына түбегейлі өзгеріс енгізеді. Израиль билігіне енді UNRWA-мен ынтымақтасуға тыйым салынады.
Ұйымға соғыстан зардап шеккен Газада, сондай-ақ Шығыс Иерусалим мен Батыс жағалауда жұмыс істеуге тыйым салынады.












